Боловсролын сайдын үүрэг гүйцэтгэгч П.Наранбаяр дараах мэдээллийг өглөө. 

Та сайдын албан тушаалаа албан ёсоор хүлээлгэж өгсөн үү?
Ерөнхий сайд огцорно гэдэг нь танхим, сайд нар мөн тэр чигтээ огцорч байна гэсэн үг. Тиймээс ажлаа албан ёсоор өгсөн гэж ойлгож болно. Хоёр жил гаруйн хугацаанд Боловсролын сайдын албан тушаалыг хашлаа. Өөрийнхөө хэмжээнд чадах зүйлсээ, шийдэх ёстой зүйлсийг шийдлээ. Багш ажилтнуудын үндсэн цалинг 50 хувиар нэмэгдүүлж, хөрөнгө оруулалтыг 2 дахин нэмэгдүүлж, Боловсролыг дэмжих жилийн хүрээнд олон ажлыг төлөвлөж, Засгийн газраар батлууллаа. Сургуулийн өмнөх боловсрол болон сургуулийн бага боловсролын хөтөлбөрүүдийг шинэчиллээ. Тэгэхээр цаашдаа үргэлжлүүлж энэ ажлыг авч явах сайд маань эдгээр ажлыг улам эрчимжүүлээсэй гэж хүсэж байна. Миний зүгээс дэмжиж  ажиллах болно. 

Сэтгүүлч "Хамтарсан намуудаас дарамт шахалт ирэв үү. Хэрэв шинэ Засгийн газарт таныг ажиллуулах хүсэлт ирвэл та хэрхэн хүлээн авах вэ" хэмээн асуухад тэрбээр "Төрийн ажил бол байнгын шүүмжлэл дунд, олон нийтийн хараанд байдаг. Энэ бүгдийг өөртөө шингээж авах ёстой. Төрийн ажил ингэж л явдаг. Би хувийн хүсэл бодлоо яг одоо илэрхийлэхэд бэлэн биш байна" гэлээ. 

Сэтгүүлч "Ерөнхий сайдыг огцруулах санал асуулгад та эсрэг байр суурьтай байсан. Ер нь Засгийн газрыг тогтвортой байх ёстой гэж боддог уу?" гэхэд "Тэр бол танхимыг бүрдүүлж байгаа сайдын хувьд л барьсан байр суурь маань юм. Би огцрох өргөдлөө өгсөн байсан. Өнөөдөр Монгол Улсын төр тогтвортой байх нь дэлхийн хэцүү цаг үед маш чухал зүйл. Дайн, геополитикийн хүнд асуудлууд байгаа цагт энх тайвныг эрхэмлэж, олон тулгуурт харилцаагаа бодсон ч Засгийн газрыг олон удаа "холбируулах" нь Монголын эрх ашигт нийцэхгүй гэж боддог. Гэхдээ сайд нар солигдох нь байдаг үзэгдэл ч Засаг бүхэлдээ огцрох нь маш олон ажил, хэлцэл, төслийг гацаадаг, эргэлзэх байдал үүсгэдэг сул талтай. Ялангуяа хөрөнгө оруулалттай холбоотой асуудалд, сайд солигдохоор өмнө нь ярьсан зүйл хэрэгжих болов уу гэж итгэл нь буурдаг. Нөгөө асуудлаа дахиад ярилцах, ширээний ард суух гэсээр 2-3 сар болж зун болдог.

Олон улсын нөхцөл байдал таамаглахын аргагүй байна, хөрөнгө оруулалт бараг зогсонги байдалд орчихлоо шүү дээ. Хөрөнгө оруулалтын сангууд мөнгөө эргүүлээд татаад эхэллээ. Энэ бол муугийн дохио.  Тэгэхээр ийм нөхцөл байдал биднээс "амьд үлдэхийн тулд" хурд шаардаж байна. Тиймээс дараагийн засгийн газрыг тогтвортой ажиллуулчхаасай гэж би хүсэж байна. Хэрэв тэгвэл Монгол улсад хэрэгтэй, асуудлууд байвал засаад явах ёстой. Мэдээж би өөрийгөө төгс сайд байсан гэж хэлэхгүй. Хэн нэгнийг буруутгахгүй, алдаа байвал надтай холбож болно" гэлээ.