УИХ-ын чуулганы хуралдаан эхэллээ. Өнөөдрийн хуралдаанаар УИХ-ын дарга Н.Учралын ажлаа хүлээлгэн өгөх хүсэлтийг хэлэлцэн шийдвэрлэнэ.  

Хуралдааныг УИХ-ын дэд дарга Ж.Эрдэнэбат даргалан явуулж байна. Төрийн байгуулалтын байнгын хорооны саналаар санал хураана.    

Монгол Улсын Их Хурлын дарга Н.Учралын үүрэгт ажлаасаа чөлөөлөгдөх хүсэлтийг хэлэлцсэн талаарх Төрийн байгуулалтын байнгын хорооны санал, дүгнэлтийг Улсын Их Хурлын гишүүн Ц.Сандаг-Очир танилцууллаа.

Монгол Улсын Их Хурлын дарга Ням-Осорын Учрал Монгол Улсын Их Хурлын тухай хуулийн 12 дугаар зүйлийн 12.2.1 дэх заалтыг үндэслэн 2026 оны 03 дугаар сарын 30-ны өдөр Монгол Улсын Их Хурлын даргын үүрэгт ажлаасаа өөрөө чөлөөлөгдөх хүсэлтээ хүргүүлсэн байна.

Төрийн байгуулалтын байнгын хороо Монгол Улсын Их Хурлын тухай хуулийн 12 дугаар зүйлийн 12.3 дахь хэсэгт заасныг баримтлан 2026 оны 03 дугаар сарын 30-ны өдрийн хуралдаанаараа уг хүсэлтийг хэлэлцсэн байна. Байнгын хорооны хуралдаанд Монгол Улсын Их Хурлын дарга Н.Учрал Монгол Улсын Үндсэн хуулийн Гучин есдүгээр зүйлийн 2 дахь хэсэгт заасны дагуу Монгол Улсын Ерөнхий сайдад нэр дэвшүүлэх шийдвэр гарсан тул Монгол Улсын Их Хурлын тухай хуулийн 12 дугаар зүйлийн 12.2.1 дэх заалтыг удирдлага болгон Монгол Улсын Их Хурлын даргаас чөлөөлөгдөх хүсэлт гаргаж байгаагаа танилцуулжээ.

Байнгын хорооны хуралдаанаар Монгол Улсын Их Хурлын дарга Ням-Осорын Учралын Монгол Улсын Их Хурлын даргын үүрэгт ажлаас чөлөөлөгдөх өөрийнх нь хүсэлтийг шийдвэрлэхээр ил санал хураалт явуулахад хуралдаанд оролцсон гишүүд олонх дэмжсэн хэмээн Ц.Сандаг-Очир гишүүн танилцуулав.

101 гишүүн санал өгч, 80.2 хувиар санал дэмжигдэв. Ингэснээр хуралдаанд оролцсон гишүүдийн олонх дэмжсэн тул Н.Учралыг УИХ-ын даргаас чөлөөлсөн УИХ-ын тогтоолыг баталсанд тооцов. Хуралд даргалаг Ж.Бат-Эрдэнэ дээрх үгийг хэлсний дараа зарим гишүүн алга ташихад зарим гишүүн шоолон инээлдэв.       

УИХ-ын дарга Н.Учрал: Хэдий богино хугацаанд ажилласан ч би үр бүтээлтэй ажилласан. Намын даргын албан тушаалаа ашиглаагүй. Таван намаас бүрдсэн УИХ-ын бүх нам, бүх гишүүнд ижил тэгш хандаж, парламентыг чөлөөт мэтгэлцээний талбар байлгахад анхаарсан. АН-аас тавьсан шаардлагыг мана намынханд ярилцаад хүндэтгэлтэйгээр хүлээн авлаа" гэв.         

УИХ-ын чуулганы хуралдаан 14.00 цагт үргэлжилнэ. 

Төрийн байгуулалтын байнгын хороо өглөө 09.00 цагт "Монгол Улсын их хурлын дарга Н.Учралын үүрэгт ажлаас чөлөөлөгдөх хүсэлтийг дэмжье" гэсэн томьёоллоор санал хураасан юм.