18 настай Сиан Алдертон нь  найзуудтайгаа үдэшлэгт явж байхдаа вэйп (цахилгаан тамхи)-аа хуваалцсаны улмаас менингит тусаж эмнэлэгт хэвтжээ. Эмч нар түүнийг дараагийн 24 цагийг давж гарахгүй байж магадгүй хэмээн анхааруулсан байна.

Эмч нар Алдертон өвчнөө үдэшлэгийн үеэр халдвар авсан гэж үзэж байна. Халдвар нь үнсэлцэх эсвэл вэйп хуваалцсанаас болсон байж магадгүй гэж тайлбарлажээ.

Тэрбээр найзуудтайгаа хамт нэгэн үдэшлэгт оролцсон бөгөөд хоёр хоногийн дараа түүнд хачирхалтай, хүчтэй шинж тэмдгүүд илэрч эхэлжээ. Түүний ээж  хэлэхдээ “Орой 8 цагийн үед ‘Ээжээ, би өөрийгөө сайн мэдрэхгүй байна’ гэж хэлсэн. Тэр надтай цуг хэвтмээр байна гэж хүссэн нь энгийн бус шинж тэмдэг байсан” гэжээ.

Энэ өвчнийг хэн ч тусах эрсдэлтэй гэдгийг хүмүүс мэдэх хэрэгтэй.

Улмаар ээж нь охиноо яаралтай эмнэлэгт хүргэж, эмч нар үнэлгээ хийсний дараа түүнийг менингит туссан, дараагийн 24 цагийг давж гарахгүй байж магадгүй хэмээсэн байна.

Мэёо Клиникийн мэдээлснээр, менингит нь тархи болон нугасыг хүрээлж буй шингэн болон бүрхүүлийн халдварт үрэвсэл бөгөөд толгой өвдөх, халуурах, хүзүү хөшсөн шинж тэмдгээр илэрдэг. Заримдаа эмчилгээгүйгээр хэдэн долоо хоногт сайжирч болох ч, энэ өвчин амь насанд аюултай тул хүчтэй антибиотик эмчилгээ шаарддаг.

Охин хэлэхдээ, “Би тэр үдэшлэгт олон хүнтэй вэйп хуваалцсан, магадгүй тэндээс халдвар авсан байх” гэжээ. Аз болоход, одоо 19 настай Алдертон өвчнөөсөө бүрэн эдгэрч, тархинд ямар нэгэн удаан хугацааны гэмтэлгүй байгаа нь шинжилгээгээр нотлогджээ.

Гэвч энэ эрүүл мэндийн асуудал түүнд ямар нэгэн олон нийтийн газар очиход болгоомжлол бий болгожээ. Тэр хэлэхдээ, “Тэр цагаас хойш би үдэшлэгт очоогүй. Хамгийн их зориг гаргаж  нэг удаа пабад 1-2 цаг л байсан” гэжээ.

Ээж нь нэмж хэлэхдээ, “Энэ өвчнийг хэн ч тусах эрсдэлтэй гэдгийг хүмүүс мэдэх хэрэгтэй. Хэн ч халдвар авах магадлалтай. Биеийн байдал сайн эсвэл эрүүл байсан ч энэ өвчин тусах эрсдэлтэй” гэжээ.

Эх сурвалж: The People