Төрийг хохиролгүй болгох, зориуд “үнэгүйдүүлсэн”, царцаасан хөрөнгүүдийг эдийн засгийн эргэлтэд оруулах зорилгоор Ажлын хэсэг байгуулсан. Үүнээс хойш хагас жилийн хугацаа өнгөрчээ. Тус ажлын хэсэг өнөөдөр Ерөнхий сайд Г.Занданшатарт ажлын явцаа танилцуулав.     

Ерөнхий сайд Г.Занданшатар: 120 тэрбум хохирол барагдуулсан нь хангалтгүй байна. Хөрөнгийн менежмент хуулийн зохицуулалтгүй, шийдвэрлэх арга зам нь тодорхой бус байна. Үүний улмаас төр, иргэн хохирдог. Ажлын хэсэг энэ хуулийн төслийг яаралтай боловсруулах хэрэгтэй. Төслүүд нь бэлэн байгаа юм билээ. Өмнөх Засгийн газрын үед өргөн барьсан, авлигын хөрөнгийг хураах хуулийн төслийг яаралтай горимоор хэлэлцүүлнэ. Төрийг хохиролгүй болгохын тулд цогц шийдэл хэрэгтэй.

Нийгмийн даатгал, Эрүүл мэндийн даатгалын ерөнхий газар баахан мөнгө алдчихсан атлаа айгаад шийдэхгүй байна. та нарын мөнгө биш болохоор тэгж байна. Төрийн мөнгө уйлдаггүй гэдэг шиг. Ашиглаж болох зөндөө актив үнэгүйдэж байна" гэв.

Сүүлийн зургаан сард ажлын хэсэг 120 тэрбум төгрөгийн хохирол барагдуулжээ. Гэхдээ нийт авлагатай харьцуулахад хангалтгүй гэж үзэж байна. 

Тиймээс авлигын замаар олж авсан хөрөнгийг хураах тухай өмнөх Засгийн газрын үед өргөн барьсан хуулийн төслийг УИХ-аар яаралтай горимоор хэлэлцүүлэхээр хандах, 

Өр төлбөрт тооцож авсан объектуудад зах зээлийн үнэлгээ хийх, хохирол барагдуулах, худалдах тогтолцоог шинэчлэх хуулийн төсөл боловсруулж, ойрын хугацаанд Засгийн газрын хуралдаанд танилцуулахыг Ажлын хэсэгт даалгалаа. 

Төрийн өмчийн бодлого зохицуулалтын газрын дарга Б.Цэнгэл "Нийт 1.8 их наяд төгрөгийн асуудал бий. Үүний 1.3 их наяд нь Хөгжлийн банкны зээлүүд. Мөнгөн хөрөнгөөр 45 тэрбум төгрөг, биет хөрөнгөөр 67 тэрбум төгрөгийн өрийг төлүүлэв.

Капитал, Үндэсний хөрөнгө оруулалтын банк, Чингис хаан, Хөгжлийн банкны чанаргүй зээлийн судалгааг гаргасан. 

• Капитал банкны нийт 173 тэрбум төгрөг, 
• Үндэсний хөрөнгө оруулалтын банканд нийт 59 тэрбум, 
• Чингис хаан банканд 250 тэрбум буюу нийт 482 тэрбум төгрөгийн зээлийг шийдэх шаардлагатай. 

18 байгууллага эдгээр зээлийг авчээ. Дуудлага худалдаагаар оруулах бололцоотой 52 объект бий. Албадан дуудлага худалдаагаар борлогдоогүй хөрөнгө бас бий. 15 объект бий. Нийт үнэлгээ нь 16 тэрбум төгрөг" гэв.
 
Капитал банкны эрх хүлээн авагч: Нийгмийн даатгалын ерөнхий газарт мөнгөн хөрөнгөөр 1.3 тэрбум төгрөг, хоёр үл хөдлөх хөрөнгө (6.5 тэрбум төгрөгийн үнэтэй) шилжүүлсэн. Шүүхийн шийдвэр гүйцэтгэх ерөнхий газар, нийслэлээс ажлын хэсэгт мэргэжилтнүүд багтан, бид хамтарч ажиллаж байна гэв. 

Эрүүл мэндийн даатгалын ерөнхий газарт мөнгөн хөрөнгөөр 1.3 тэрбум төгрөгийн өрийг барагдуулжээ