Ерөнхий сайд Г.Занданшатар өнөөдөр /2026.03.21/ Дэлхийн усны өдрийг тохиолдуулан Усны газарт ажиллав. 

Улсын хэмжээнд өнгөрсөн онд 682 сая м.куб ус ашигласан. Гэвч 252 сая м.куб буюу 3/1 нь л ус бохирдуулсны төлбөрт 7.5 тэрбум төгрөг төлсөн. Энэ төлбөрийг бүрэн авч чадсан бол 2025 онд улсын төсөвт 20 гаруй тэрбум төгрөг төвлөрүүлэх байжээ. 

Хамгийн их ус ашигладаг 10 компанийн нэг болох “Оюу толгой” үйлдвэр сүүлийн 15 жилд ус бохирдуулсны төлбөрт нэг ч төгрөг төлөөгүй өнөөдрийг хүрчээ. 

Усны газар 2020-2025 онд тус компанийн бохирдуулсан усны төлбөрийг Эрдэнэт үйлдвэрийн жишгээр тооцоолоход 5.1 тэрбум төгрөг болсон байна. “Оюу толгой”-н зүгээс гэрээгээр хүлээсэн ийм үүрэггүй гэж тайлбарладаг талаар Усны газрын дарга З.Батбаяр хэллээ. 

НҮБ-ын Усны конвенц, тогтвортой хөгжлийн зорилт, хүчин төгөлдөр мөрдөж буй хуулиудыг үндэслэн тус компаниас ус бохирдуулсны төлбөр авах бүрэн үндэстэй гэж Ерөнхий сайд Г.Занданшатар байр сууриа илэрхийллээ. Тиймээс зөвхөн “Оюу толгой”  гэлтгүй ус бохирдуулж буй бүх компаниас хуулийн дагуу төлбөрөө авахыг Усны газарт үүрэг болгов.

“Ус хангагч нь хамгаалагч, бохирдуулагч нь төлөгч” гэсэн олон улсын зарчмыг жигд мөрдүүлж цэгцлэх цаг нь болсон гэжээ. 

“Оюу толгой” 2020-2025 онд жилд 12.3 сая м.куб- 17.0 сая м.куб ус бохирдуулсан гэж Усны газар үзэж байна гэж Засгийн газрын хэвлэлийн алба мэдээлэв.

"Оюу толгой" үйлдвэр орон нутгийн иргэдийн ундны усны эх үүсвэрээс тусдаа буюу газрын гадаргаас доош 150-400м гүнд байдаг эх үүсвэрээс усаа татаж хэрэглэдэг. Усныхаа 87% дахин ашигладаг.

Мөн Монгол Улсын хууль тогтоомж, холбогдох гэрээнд заасны дагуу ус ашигласны төлбөрөө бүрэн төлдөг. 2025 онд 23.9 тэрбум төгрөг, 2013 оноос хойш нийт 218 тэрбум төгрөгийг ус ашигласны төлбөрт төлжээ.