Аюулгүй байдал, гадаад бодлогын байнгын хороо хуралдаж байна. Өнөөдрийн хуралдаанаар:

• Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр соёрхон батлах тухай хуулийн төсөл /Засгийн газар 2025.12.26-ны өдөр өргөн мэдүүлсэн, соёрхон батлах/
• Гадаад харилцааны яамны 2025 оны үйл ажиллагааны талаарх Гадаад харилцааны сайдын мэдээллийг сонсох

НДЕГ-ын дарга Л.Мөнхзул: 

Нийгмийн хамгааллын хэлэлцээр хийхэд хоёр орны харилцаан дээр их тулгуурладаг. Бид Европын стандарт гэрээг ихэвчлэн байгуулж байна. Ази Номхон Далайн бүсээс анх удаа Австрали улстай байгуулах хэлэлцээрийг гурван удаа хийсэн. 

Япон улсад Монголын нийгмийн хамгааллын асуудал хариуцсан хоёр хүн элчин сайдын яаманд ажиллаж байна. Японтой цаашдаа ажиллах зорилт тавьж байна.

АНУ-д амьдарч байгаа монголчууд нутаг буцах тохиолдолд шимтгэлээ буцааж авах боломжгүй байна. Энэ асуудлаар АНУ-д байгаа МУ-н элчин сайдын яамтай хамтарч ажиллаж өмнө явсан хэлэлцээрүүдийн шатыг урагш ахиулах чиглэлээр хамтарч ажиллаж байна.

Энэ оны бидний зорилго бол Австрали улстай хэлэлцээрээ урагшлуулах, АНУ-тай хэлэлцээрийг дараагийн түвшинд гаргах, мөн цаашлаад Япон, Швед зэрэг монголчууд олноор суурьшиж байгаа орнуудтай хэлэлцээрийн шатыг эхлүүлэх түргэтгэх зорилттой байна.    

Гэр бүл, хөдөлмөр, нийгмийн хамгааллын сайд Аубакир:
Төрөлт буурч байгаа асуудал зөвхөн манай улсын асуудал биш болсон. Франц улс 2025 онд анх удаа нас баралт нь төрөлтөөсөө илүү гарлаа. Хятад улсад 2025 онд түүхэндээ хамгийн бага хүүхэд төрсөн жил болсон. Тийм учраас Гэр бүл хөдөлмөр нийгмийн хамгааллын яамнаас төрөлтийг дэмжих бодлогуудаа хуулиараа дамжуулаад хэрэгжүүлээд явж байна. 3 ба түүнээс дээш хүүхэдтэй, 4 ба түүнээс дээш хүүхэдтэй бол эдийн засгийн хөшүүргүүдийг оруулсан хуулиудыг оруулж байна.   

Гэр бүл, хөдөлмөр, нийгмийн хамгааллын яамнаас энэ оныг "Хөдөлмөр эрхлэлтийг дэмжих жил болгон зарласан". Хөдөлмөр эрхлэлтийг дэмжих сангаараа дамжуулаад хөдөлмөр эрхэлбэл үзүүлэх хөшүүрэг, халамж биш хөдөлмөрлөдөг байгаач гэдэг бодлогыг манай яам илүү барьж байна.

НДЕГ-ын Бодлогын хэрэгжүүлэлтийн газрын дарга н.Ганцэцэг:

ГХЯ-ны 2025 оны эхний хагас жилийн мэдээгээр 51 улсад 266 мянган Монгол улсын иргэд ажиллаж амьдарч байна. Манай салбар 6 улстай нийгмийн хамгааллын хэлэлцээр байгуулсан. Үүний хүрээнд жилдээ 2000 иргэн нийгмийн хамгааллын үйлчилгээ авч байна. Бусад улсад байгаа иргэдийн хувьд Монголдоо нийгмийн даатгалын сайн дурын үйлчилгээнд хамрагдах эрхтэй.

НДЕГ-ын дарга Л.Мөнхзул: 

Монголчууд хамгийн олноор БНСУ-д ажиллаж амьдарч байна. БНСУ-д 50 гаруй мянган иргэн, үүний дотор 10 орчим мянга нь хүүхэд байна. Засгийн газар хоорондын хэлэлцээрийн хүрээнд хөдөлмөрийн гэрээгээр ажиллаж байгаа эрх ашгийг хамгаалах зорилгоор иргэдэд туслалцаа үзүүлэх нэг цэгийн үйлчилгээ БНСУ-н Сөүл хотод ажиллаж байна. Харин улирлын шинж чанартай буюу түр зуур зорчих аяллын визээр очсон иргэдийн хөдөлмөрлөх эрх зөрчсөн асуудлыг хүсэлт ирсэн тохиолдолд нэг цэгийн үйлчилгээний албан хаагчид холбон зуучлах, орчуулгаар хангах тусламж үзүүлж байна. Яг хэдэн хүн богино хугацаагаар ажиллаж байгаа бүртгэл тодорхой бус байдаг.

Монгол Улсын Их Хурлын гишүүн: Д.Ганбат:

Хилийн чанадад 300,000 иргэд гадаадад ажиллаж байна. Энэ тоо хөдөлмөр эрхлэх чадвартай 900,000 иргэдийн гуравны нэг байна. Иргэдийн 80 хувь нь гадаад явах хүсэлтэй байгаа нь аюулын харанга дэлдэж байна. 

"Нийгмийн хамгааллын тухай Монгол Улс болон Бүгд Найрамдах Австри Улс хоорондын хэлэлцээр"-ийг соёрхон батлах тухай хуулийн төслийг дэмжих талаар санал хураалт явууллаа. 

Санал хураалтаар гишүүдийн 62,5 хувиар дэмжигдлээ.