Монгол Улсын Орчин цагийн Зэвсэгт хүчин үүсэж хөгжсөний 105 жилийн ой, “Монгол цэргийн өдөр”-ийг тохиолдуулан Батлан хамгаалах салбар иргэд, олон нийтэд зориулсан “Нээлттэй хаалганы өдөрлөг” зохион байгуулахаар болжээ.

Тус өдөрлөг 2026 оны гуравдугаар сарын 17-19-ний өдрүүдэд Жанжин Д.Сүхбаатарын талбайд болно. Арга хэмжээний үеэр батлан хамгаалах салбарын байгууллагууд үйл ажиллагаагаа танилцуулж, иргэдэд нээлттэй мэдээлэл, үйлчилгээ үзүүлэх аж.

Энэ жил Монголын түүхэнд тэмдэглэлт олон ой давхцаж буй. Тухайлбал, Монголын тулгар төрийн 2235 жил, Их Монгол Улс байгуулагдсан-ы 820 жил, Ардын хувьсгал-ын 105 жил, мөн Монгол Улсын Батлан хамгаалах яам байгуулагдсаны 115 жилийн ой тохиож байна. Эдгээр ойг иргэдэд илүү хүртээмжтэй, шинэлэг байдлаар сурталчлахыг зорьж буйг албаныхан онцоллоо.

Зэвсэгт хүчний жанжин штаб-аас мэдээлснээр батлан хамгаалах салбар “хаалттай” гэх шүүмжлэлд анхаарч, хэвлэл мэдээллийн байгууллагуудтай нээлттэй хамтран ажиллах бодлого баримталж байгаа аж. Энэ хүрээнд өнгөрсөн онд Хэвлэл мэдээллийн төвөө байгуулж, мэдээллийн ил тод байдлыг нэмэгдүүлэх арга хэмжээнүүдийг хэрэгжүүлж эхэлжээ.

Зэвсэгт хүчний 105 жилийн ойн хүрээнд нийт 35 томоохон ажил, арга хэмжээ төлөвлөж хэрэгжүүлсэн бөгөөд ойг угтсан үйл ажиллагаанууд өнөөдөр, маргааш бүрэн биелэх юм. Мөн эдгээр ажлыг Ухнаагийн Хүрэлсүх-ийн зарласан “Залуу офицеруудын хөгжлийн жил”, Батлан хамгаалах салбарын “Хүн төвтэй хөгжлийн жил” зорилтуудтай уялдуулжээ.

Өдөрлөгийн үеэр дараах үйлчилгээ, арга хэмжээнүүдийг зохион байгуулна. Үүнд:

• Батлан хамгаалах төв архив - лавлах үйлчилгээ
• Цэргийн төв эмнэлэг - урьдчилан сэргийлэх эрүүл мэндийн үзлэг
• Цэргийн штабын байгууллагууд - цэргийн бүртгэл, гэрээт албанд элсүүлэх бүртгэл
• Алдар спорт хороо - спортын тэмцээн, уралдаан
• Монгол цэргийн музей - Зэвсэгт хүчний 105 жилийн түүхэн үзэсгэлэн
• Төрөл мэргэжлийн цэргийн үзэсгэлэнгүүд
• Цэргийн урлагийн тоглолт
• Хип хоп дууны уралдаан

Зохион байгуулагчдын мэдээлснээр энэхүү өдөрлөг нь Зэвсэгт хүчний түүхэн ойг тэмдэглэхээс гадна иргэдэд батлан хамгаалах салбарын үйл ажиллагааг танилцуулах, олон нийттэй ойр ажиллах чухал ач холбогдолтой аж.

Эх сурвалж: Зэвсэгт хүчний жанжин штабын хэвлэл мэдээллийн хэлтэс