Гэр бүл, хөдөлмөр, нийгмийн хамгааллын яам Хувийн нэмэлт тэтгэврийн тухай анхдагч хуулийн төслийг боловсруулаад байна. Хуулийн төслийн нээлттэй хэлэлцүүлгийг өнөөдөр Монголын хөрөнгийн биржийн байранд олон нийтэд нээлттэй хэлэлцүүллээ.

Хэлэлцүүлгийн хүрээнд “Хувийн нэмэлт тэтгэврийн олон улсын туршлага ба хөрөнгийн зах зээлд үзүүлэх нөлөөлөл”, “Монгол Улсад хувийн нэмэлт тэтгэврийн тогтолцоог нэвтрүүлэх боломж ба сорилтууд” сэдвээр панел хэлэлцүүлэг өрнүүлсэн юм.   

Манай Улсад өнөөдрийн байдлаар 135.7 мянган хүн тэтгэврийн хуримтлал санал болгож буй даатгалын болон тэтгэврийн санд хамрагдаж, нийт 63.4 тэрбум төгрөгийн хуримтлалыг бий болгоод байна.

Хувийн тэтгэврийн хуримтлалд хамрагдах иргэдийн оролцоо нэмэгдэж байгаа хэдий ч Монгол Улсад энэхүү харилцааг зохицуулсан хууль эрх зүйн орчин бүрдээгүй байгаа тул тэдний эрх зөрчигдөх эрсдэл байсаар байна.

Иймд Хувийн нэмэлт тэтгэврийн тухай анхдагч хуулийн төслийг холбогдох талуудын оролцоог ханган боловсруулсан нь өндөр ач холбогдолтой болохыг оролцогчид онцолсон. 

Хувийн тэтгэврийн тухай хуулийг баталснаар ажил олгогчид хүний нөөцийн шинэ бодлого хэрэгжүүлж, ажилтнаа тогтвор суурьшилтай ажиллуулах, нийгмийн хариуцлагаа хэрэгжүүлэх, бүтээмжээ нэмэгдүүлэх ач холбогдолтой юм.

Түүнчлэн даатгал, тэтгэврийн сангуудын хөрөнгийн хэмжээ өсөж, урт хугацааны дотоодын хөрөнгө оруулалтын эх үүсвэр нэмэгдсэнээр санхүүгийн зах зээлийн тогтвортой хөгжилд дэмжлэг үзүүлнэ. Иргэд хувийн нэмэлт тэтгэврийн хуримтлалаасаа өөрөө сонгож, нэг удаа, 5-10 жилийн хугацаанд, мөн насан туршдаа тэтгэвэр авах боломжтой болно.

Мөн иргэн тэтгэврийн наснаас өмнө хөдөлмөрийн чадвараа алдсан тохиолдолд тэтгэвэр тогтоолгох эрхтэй бөгөөд нас барсан бол тэтгэврийн хуримтлалаа өвлүүлэх боломжтой.

Эх сурвалж: Гэр бүл, хөдөлмөр, нийгмийн хамгааллын яам