“Бамбарууш” кафе нь гэр бүлийн гэдэг тодотголтой ресторан. Үндэсний цэцэрлэгт хүрээлэнгийн захиргааны байрны нэг давхарт байрлана. Цэцэрлэгт хүрээлэнгээр аялж, зугаалж буй гэр бүл болоод найз нөхөдтэйгөө яваа хүмүүс үйлчлүүлэхэд тохиромжтой. Бусад ресторанаас онцлог хэд хэдэн зүйл энд бий. Өвлийн хуваарийн дагуу өдөр бүр 10.00-20.00 цагийн хооронд нээлттэй.

Хоолны цэсэнд хүүхэд идэхэд тохиромжтой бантан, үзэмтэй будаа, каш, зутан, үзэмтэй брэс, сүүтэй будаа гэх мэт хоол бий. Ийм төрлийн хөнгөн хоол дунджаар 3000 төгрөгийн үнэтэй байх аж. Түүнээс гадна бүх насны хүүхэд болон нялх биетэй, жирэмсэн, хөхүүл ээжүүдэд зориулсан хоолтойгоороо бусад зоогийн газраас ялгаатай. Хоолны цэсэнд зөвхөн монгол ч биш паста карбонара, зутан шөл, яргай загас гэх мэт европ болон цагаан хоол ч багтсан.

Дотоод орчныг энгийн, тухтай байлгахаар зорьсон нь модон тавиур, авсаархан ширээ сандал, номын сан зэргээс нь харж болно. Номын санд алдартай зохиолчдын ховор зохиолуудаас тавихаар зорьжээ.

“Хотоор дүүрэн ресторан байвч хүүхдэд зориулсан газар тун ховор. Биднийг жаахан байхад хаалгаар нь оронгуут сайхан үнэр үнэртдэг “Бамбарууш” кафе гэж байсан. Тэр кафегаар хүүхэд бүр аав, ээжтэйгээ хамт үйлчлүүлдэг байв. Хожим зах зээлд шилжээд байрыг нь хувьчилж, уушийн газар болсонд нь хүмүүс их л харамсаж ярьдаг. Бид ярилцаад хуучны “Бамбарууш” кафегийн үйл ажиллагааг сэргээхийг зорьсон.

Ресторандаа согтууруулах ундаагаар үйлчлэхгүй байхаар шийдэж, дээр үеийн “Бамбарууш” кафед байсан каш, үзэмтэй будаа, бантан, зутан, сүүтэй будаа, цөцгийтэй будаа зэрэг хүүхдийн хоол гаргадаг болсон” хэмээн үүсгэн байгуулагч Х.Одбаяр нар Unread.today сайтад өгсөн ярилцлагадаа дурджээ.