Ливаны Эрүүл мэндийн яамнаас мэдээлснээр тус улсын нэгэн тосгон руу дайрч, 41 хүн үрэгдэн, 40 хүн шархаджээ.

Израил тус улс дахь Хезболлахын төвүүд рүү энэ сарны 2-оос хойш агаараас, газраас дайрсаар байна. Нийт 394 хүн үрэгдсэний 83 нь хүүхэд. Шархадсан нийт хүний тоо 1130 байна. 

Ливаны Наби Чит тосгон хохирогчдын нэрсийг зарлахад гурав нь цэрэг байжээ. 40 жилийн өмнө Израилын нисгэгч энэ тосгонд алуулсан аж. Түүний шарилыг олох зорилгоор Израилчууд ажиллагаа явуулж, тосгоны оршуулгын газрын дэргэд том нүх ухсан ч олоогүй байна. 

Хезболлах бүлэглэл энэ бүсэд идэвхтэй ажилладаг. Тэд бөмбөгдөлтийн дараа сэтгүүлчдэд тосгон рүү нэвтэрч, байшингууд хэрхэн сүйдсэн, машинууд яаж шатсаныг харахыг зөвшөөрчээ. 

Израил цэргүүд баасан гарагийн шөнө Ливаны армийн хувцас өмсөж, Исламын эрүүл мэндийн байгууллагын логотой түргэн тусламжийн машинаар ирж, тосгоныг бүслээд, Хезболлахын цэргүүд рүү дайрсан. Буудалцааны дараа израил цэргүүдийг нисдэг тэргээр авч явсан байна.     

Тосгоны иргэд шийтүүд (Исламын шашны нэг урсгал) бөгөөд тэд бүгд Хезболлахын гишүүд биш боловч гэрээ хамгаалахын тул изриал цэргүүдийн өөдөөс гал нээжээ. Израил өмнө нь ч энэ тосгон руу дайрч байжээ. 1-2 байшин руу гал нээдэг байсан бол сүүлийн удаад зогсолтгүй галласан гэж гэрчүүд ярьсан байна. 

Шөнийн турш үргэлжилсэн ажиллагааны дараа израил нэг ч цэрэг нь шархдаагүй гэжээ. Харин 40 жилийн өмнө алуулсан, израил нисгэгчийн эхнэр "Цэргүүдийг эрсдэлд оруулан, Роны шарилыг хайхгүй байхыг би өмнө нь ч хүссэн. Гэвч дарга нар миний үгийг ойлгоогүй бололтой. Цэргүүдийн амийг эрстүүлэн байж Ронд юу тохиолдсоныг мэдэхийг хүсэхгүй  байна" гэжээ.        

Шийтүүдийн байгуулсан, улс төрийн бүлэглэл болох Хезболлахыг АНУ, Их Британи зэрэг орнууд алан хядагч гэж үздэг. Ливаны арми Израил, Хезболлахын мөргөлдөөнөөс өнөөг хүртэл зайлсхийсээр иржээ.

Эх сурвалж: BBC