Засгийн газар 2026 оныг Хөдөлмөр эрхлэлтийг дэмжих жил болгон зарлаж, иргэдээ ядуурлаас гаргах зорилго тавин ажиллаж байна.

Энэ талаар өнөөдөр /2026.03.06/ Ерөнхий сайд Г.Занданшатар, Ядуурлыг бууруулах үндэсний санаачилга өрнүүлж, Ерөнхий сайдын албан даалгавар гаргалаа. Ажил хөдөлмөр эрхэлж буй хүн бүрийг дэмжинэ. Энэ хүрээнд татвар, зээлийн таатай нөхцөл бүрдүүлэх, ажлын байр бий болгох цогц төлөвлөгөө хэрэгжуүүлнэ. Залуучууд, ахмадууд, эмэгтэйчүүдийн ажил эрхлэлтийг дэмжиж, чиглэл чиглэлээр ажил эрхлэлтийн  бодлого хэрэгжүүлнэ.

2025 онд эдийн засгийн өсөлт 6.8 хувьд хүрч, бидний төсөөлснөөс өндөр өсөлт гарсан. Эдийн засгийн өсөлт айл бүрийн амьжиргаанд мэдрэгдэх учиртай.

Энэ санаачилгыг хэрэгжүүлэхийн тулд баг, сум, аймаг, хот, дүүрэг, хорооны бүх шатны Засаг дарга нар, ИТХ-ын төлөөлөгч, хэсгийн ахлагч нарын 2026 оны ажлын үндсэн үзүүлэлт, үүрэг зорилго бол айл бүртэй тулж ажиллаж, иргэдээ нэр устай нь хариуцан авч ажиллаж, ядуурлаас гаргах үүрэг өгч байна. Үүгээр нь бүх шатны Засаг дарга нарын ажлыг дүгнэнэ. Дарга нар тус бүр хүн хариуцаж ядуурлаас гаргана.

Сумын Засаг дарга нар сумаа ядууралгүй болгох ёстой. Тиймээс ажилгүй, орлогогүй байгаа иргэдээ ажилд зуучлах, хувийн бизнес эрхлэхэд нь дэмжлэг үзүүлэх, Хөдөлмөр эрхлэлтийг дэмжих, сургалтад хамруулах зэргээр ажил хөдөлмөр эрхлэхэд нь дэмжлэг үзүүлэх замаар иргэдээ ядуурлаас гаргана үүрэг хүлээн ажиллана гэв.