Нийслэлийн Засаг даргын орлогч А.Амартүвшин Эмэгтэйчүүдийн эрхийг хамгаалах өдөр эхнэрээ, хайртай найз охиноо, хайртай үрсээ папиллома вирусийн эсрэг вакцинд хамруулахыг эрчүүддээ уриалж байна. Хоёр хоногийн дараа л амьгүй болох “ямааны хоол” цэцэг авч өгч хайраа илэрхийлснээс он удаан жил хамт байхын төлөө умайн хүзүүний хорт хавдар үүсгэгчийн эсрэг вакцинд хамруулаасай” хэмээсэн.

Түүний эл уриалгыг эсэргүүцсэн ээжүүд өнөөдөр (2026.03.06) хэвлэлийн хурал хийхээр болжээ. Хурлыг “Зууны мэдээ” сонины “Үндэсний мэдээллийн төв”-д 12:00 цагт товлосон байна.

Ташрамд мэдээлэхэд, умайн хүзүүний хорт хавдар нь монгол эмэгтэйчүүдийн дунд зонхилох хорт хавдрын хоёрдугаарт бичигддэг. 15-44 насны эмэгтэйчүүдийн дунд хамгийн түгээмэл хорт хавдар бөгөөд амьдралын идэвхтэй, хөдөлмөрийн насанд байгаа олон эмэгтэйчүүдийг хамарч буй. Мөн эмэгтэйчүүдийн нас баралтын шалтгаанаар гуравдугаарт орж байна. 

Хүний папиллома нь дэлхий дахинд өндөр тархсан вирус. Энэ вирусийн үндсэн 10 төрөл нь умайн хүзүүний хорт хавдар үүсгэдэг. Мөн бүдүүн гэдэсний хавдар, залгиур хоолой, эмэгтэйчүүдэд болон эрэгтэйчүүдэд ч бэлэг эрхтний хавдар, амны болон хүзүүний хавдар  үүсгэдэг байна. (Эх сурвалж: https://gogo.mn/r/yk5w82 )

Хүний папиллома вирусийн халдварын эсрэг вакциныг дэлхийн дахинд 20 гаруй жилийн өмнөөс үйлдвэрлэн хэрэглээнд гаргаж эхэлснээс хойш улс орнууд товлолт дархлаажуулалтдаа багтаах болсон. Манай улсын хувьд энэ вакциныг 2012 онд анх удаа зорилтот бүлгийн хүүхдүүдэд хийх дархлаажуулалтад багтаан хэрэглэж байсан.

Түүнээс хойш бодлого, эрх зүйн зохицуулалтыг хийсний үндсэн дээр 2024 оноос эхлэн Монгол Улсад үндэсний товлолт дархлаажуулалтын нэг болж 11 настай хүүхдүүдийг дархлаажуулах үйл ажиллагаа эхэлсэн.