Монгол бөхийн өргөөнд “Сүрээр дарагч” хэмээх гал морин жилийн Сар шинийн баярыг угтсан цуврал барилдаан үргэлжилж байна. Ахмад бөхчүүдийн барилдаан өчигдөр болж, барилдаанд 50-иас дээш насны бөхчүүд зодоглов. 

Тус барилдааны зүүн талын тэргүүн магнайд Төв аймгийн Сэргэлэн сумын харьяат Дархан аварга Агваансамдангийн Сүхбат, барууны магнайд Увс аймгийн Тэс сумын харьяат, Улсын начин Лхаасүрэнгийн Цэвээн нарын тэргүүтэй бөхчүүд зодоглолоо. 

Дархан аварга А.Сүхбат үзүүр, түрүүнд үлдэж, Архангай аймгийн Эрдэнэмандал сумын харьяат Аймгийн арслан Ч. Эрдэнэчулуунаар даван түрүүлж, бөхөд дуртай түмнээ баясгалаа.  

Дархан аварга А.Сүхбат барилдах шийдвэрээ барилдааны өмнөх өдөр гаргажээ. Түүний хүү өсвөр насны ангилалд барилдахаар болсон бөгөөд хүү нь аавдаа ахмад бөхчүүдийн барилдаантай гэж хэлсэн байна.

Аварга үе тэнгийн үхэр хонь жилтэнгүүдтэйгээ уулзаж, нэг өдрийн бэлтгэл болгож хөлсөө гаргая хэмээн Бөхийн өргөөндөө хүрэлцэн иржээ. Тэрбээр бөхөд хайртай түмэн олонтойгоо уулзсандаа баяртай байгаагаа илэрхийлж, Монгол түмэндээ удахгүй болох сар шинийн баярын мэндчилгээ дэвшүүлэв.