2025 оны арванхоёрдугаар сараас хойш Энэтхэг улсын Баруун Бенгал мужид Нипах вирусийн халдварын тохиолдлууд бүртгэгдсэн нь Азийн орнуудыг түгшээж, хилийн үзлэг хяналтыг чангатгасан  билээ.  

Одоогоор хоёр тохиолдол батлагдсан бөгөөд нас баралт бүртгэгдээгүй байна.

ДЭМБ-ын үнэлгээгээр уг халдвар олон улсад тархах эрсдэл БАГА хэдий ч Нипах вирус нь амьтнаас хүнд дамждаг, үхлийн өндөр хувьтай (40–75%) халдварт өвчин тул Энэтхэг, Малайз зэрэг Зүүн Өмнөд Азийн орнуудад зорчих иргэдийг өндөр түвшинд сэрэмжтэй байхыг ЗӨСҮТ-өөс анхааруулж байна. 

Одоогоор Нипах вирусийн эсрэг вакцин, тусгай эмчилгээ байхгүй тул нийт ЗОРЧИГЧ та бүхнийг халдвараас сэргийлэх зөвлөмжийг чанд мөрдөж, өөрсдийн эрүүл мэндийг хамгаалж хариуцлагатай зорчихыг УРИАЛЖ байна.

Дээрх нөхцөл байдалтай холбоотой 2026.02.02 ны өдрөөс эхлэн халдварын сэжигтэй тохиолдол бүртгэгдсэн улсад зорчсон болон тус улсаар дамжин ирсэн аялагч, зорчигчдоос “ЗОРЧИГЧИЙН ЭРҮҮЛ МЭНДИЙН МЭДҮҮЛЭГ” ийг бөглүүлэн тандалт судалгаа хийж эхэлсэн тул дээрх үйл ажиллагаанд дэмжлэг үзүүлэн хамтран ажиллахыг хүсье. 

СЭРГИЙЛЭХ ЗӨВЛӨМЖ

• Жимс, хүнсийг сайтар угааж, түүхийгээр хэрэглэхээс зайлсхийх
• Сарьсан багваахай, гахай зэрэг амьтантай ойр харьцахгүй байх
• Боловсруулаагүй жимсний шүүс, түүхий хүнс хэрэглэхгүй байх
• Гараа тогтмол савангаар угаах, ариутгах
• Эрсдэлтэй бүс нутгаас ирсний дараа 14 хоног биеийн байдлаа ажиглах
• Шинж тэмдэг илэрвэл яаралтай эмчид хандах
НИПАХ ВИРУС – ТОВЧ МЭДЭЭЛЭЛ
• Жимсний сарьсан багваахай, гахай зэргээс хүнд халдварлана
• Хүнээс хүнд хоол хүнс, ойрын хавьтлаар дамжих боломжтой
• Нууц үе: 4–14 хоног
• Түгээмэл шинж: халуурах, толгой өвдөх, булчин өвдөх, бөөлжих, хоолой өвдөх
• Хүндэрвэл уушгины хатгалгаа, ухаан алдах, тархины үрэвсэл (энцефалит) үүсэх эрсдэлтэй

 ДЭМБ уг вирусийг дэлхийд хамгийн аюултай 10 халдварт өвчний жагсаалтад оруулсан байдаг. 

Эх сурвалж: Чингис хаан ОУ-ын нисэх буудал