Түгээх сүлжээний ашиглалтын үеийн засвар үйлчилгээний ажлыг гүйцэтгэхэд урт хугацаандаа үр ашигтай, насжилт уртасгасан, байгаль орчинд ээлтэй, үйлдвэрлэлд нэвтрүүлэхэд технологийн хувьд хялбар, түүхий эд олдоц ихтэй, импортын хамааралгүй байх зарчмын дагуу хуванцар материалаар кабелийн хамгаалалтын тоосгыг орлуулжээ. 

Манай ашиглалтын 10 кВ-ын НТС-РТП-001 хуваарилах байгууламжийн кабель шугам шинэчлэх ажлын хүрээнд зэрэгцээ олон кабелиуд туннел хэсэг рүү уламжлалт тоосгон хамгаалалттайг хуванцар материалаар орлуулан зарим трассыг хуванцар хамгаалалтаар хучиж туршлаа. 

Нүүрс шатааж, хүлэмжийн хий үүсгэж үйлдвэрлэдэг, хөрсний чийгт дэвтэж үйрдэг тоосгыг хуванцар материалаар орлуулснаар хөрсөнд байх насжилт олон арван жилээр уртсах боломжтой. Дахин авч ашиглахад эвдрэлгүй байгаа нь давуу талтай байна.

Нийслэлийн түгээх сүлжээний инженер техникийн ажилтнууд практикт туршиж байгаа кабелийн аж ахуйн жижиг деталь хэсэг болох кабелийн хамгаалалтыг салбарын хэмжээнд нэвтрүүлэх ажлын судалгааг үргэлжлүүлнэ.
  
Түүнчлэн агаарын шугамын намгийн хамгаалалтад зарим компани ашиглалтын үед туршиж эхэлсэн хуванцар цагиргийг мөн өөрийн үйлчлэх хүрээндээ туршсан. 

Материал бат бөх, насжилт уртаас гадна хөнгөн тул том оврын машин механизм угсралтын үед ашиглахгүй, аюулгүй ажиллагаа, хөдөлмөр зарцуулалт хөнгөвчлөх аргаар хуванцар хэсгүүдийг угсардаг, кабелийн шуудуунд дэвсэхэд хог хаягдал үүсгэхгүй зэрэг ашиглалтын үед эдийн засгийн үр өгөөж талаасаа эерэг ач холбогдолтой юм.

Эрчим хүчний салбарт ашигладаг материалын жагсаалтаас тоосгыг халж, хог хаягдал дахин боловсруулдаг үндэсний үйлдвэрүүдээ дэмжиж эх оронч худалдан авалт хамтдаа хийхийг салбарын хамт олондоо уриалж байна.

Эх сурвалж: Нийслэлийн түгээх сүлжээ компани