“Монголын үр тариа эрхлэгчдийн газар тариалан” холбооноос өнгөрсөн зургадугаар сараас эхлэн ХХААЯ-нд гангийн нөхцөл байдал үүсч болзошгүйг анхааруулж, үйл ажиллагаагаа эрчимжүүлэхийг хүсжээ. Гэсэн ч салбарын яам дорвитой алхам хийхгүй байсаар их хэмжээний ургац алдах нөхцөлийг бүрдүүлсэн гэж тэд үзэж байна.

ХХААЯ-ны зүгээс нийт талбайн 85 хувиас багагүй талбайд зөвхөн улаан буудайн тариалалт хийлгэж, зарим суманд сэлгээний ургамал огт тариулаагүй, хаврын тариаланчдын зөвлөгөөний үеэр цаг уур орчны шинжилгээний газраас энэ онд чийг сайтай, халалт олон жилийн дунджийн орчим, газар тариаланд таатай нөхцөл бүрдэх мэтээр мэдээ өгснийг буруушаав. Иймд тус холбооноос “Гамшгийн эрсдэлийн үнэлгээний хороо” байгуулжээ.

ХХААЯ-ны Газар тариалангийн бодлогын хэрэгжилтийг зохицуулах газрын дарга Ц.Болорчулуунаас энэ талаар тодруулахад “Тийм их хэмжээний ургац алдах нөхцөл байдал үүсээгүй. Долоо хоногийн дараа ургацын тайлан гарна. Тэр үед бүх зүйл тодорхой болно” гэв.