АНУ-д хэрэглэгдэж буй астмын цацлага жил бүр 530 мянган автомашины ялгаруулдаг хүлэмжийн хийн хэмжээтэй тэнцэх хэмжээний бохирдол үүсгэдэг гэж эрдэмтэд шинэ судалгаандаа дурджээ.

Калифорнийн их сургуулийн Лос Анжелес дахь салбар (UCLA) болон Харвардын их сургуулийн судлаачид үндэсний эмийн мэдээллийн санд тулгуурлан 2014–2024 оны хооронд астма болон уушгины  архаг бөглөрөлт өвчний (COPD) эмчилгээнд хэрэглэсэн гурван төрлийн цацлагын дэлхийн дулааралд нөлөөлөх хийг шинжилжээ.

АНУ-ын Анагаах ухааны нийгэмлэгийн сэтгүүл (JAMA)-д даваа гарагт нийтэлсэн тус судалгаагаар АНУ-ын өвчтөнүүдийн хэрэглэсэн цацлага нийтдээ 10 жилийн хугацаанд 24.9 сая тонн нүүрстөрөгчийн давхар исэлтэй дүйцэх хэмжээний ялгаруулалт үүсгэсэн байна.

Хамгийн их хортой нь даралтат хий ашигладаг “metered-dose inhaler” буюу “puffer” төрлийн цацлагууд байсан бөгөөд нийт ялгарлын 98 хувийг дангаараа бүрдүүлжээ. Эдгээр нь эмийг уушгинд хүргэхийн тулд hydrofluoroalkane (HFA) хэмээх хүчтэй хүлэмжийн хий ашигладаг байна.

Харин хуурай нунтаг (dry powder) болон зөөлөн мананцар (soft mist) цацлага нь даралтат хий ашигладаггүй. Эхнийх нь өвчтөний амьсгалын хүчийг ашиглан эмийг ялгаруулдаг бол хоёр дахь нь шингэнийг нарийн ширхэгтэй мананцар болгон хувиргадаг тул байгальд учруулах хор хөнөөл нь үлэмж бага байдаг.

Судалгааны гол зохиогч, UCLA-ийн уушгины эмч, судлаач Уильям Фелдман AFP-д өгсөн ярилцлагадаа “Жил бүр зам дээр явж буй 530 мянган машинтай дүйцэх хэмжээний ялгаруулалт гэдэг маш их тоо. Гэхдээ энэ асуудлыг шийдэх боломжтой, ялгарлыг бууруулах хялбар арга замууд бий” гэжээ.

Эмнэлзүйн хувьд, өвчтөнүүдийн зөвхөн өчүүхэн хэсэг нь л ийм даралтат хийтэй цацлага хэрэглэх заалттай байдаг байна.

Эх сурвалж: Al Jazeera