УИХ-ын чуулганы өнөөдрийн хуралдаан үргэлжилж байна. Чуулганы хуралдаанаар Ерөнхий сайдаар Г.Занданшатарыг томилох эсэх асуудлыг хэлэлцэж буй юм. УИХ-ын гишүүд нэр дэвшигч Г.Занданшатараас асуулт асууж байна.

УИХ-ын гишүүн Б.Бат-Эрдэнэ “Ард түмний хүлээлтэд нийцсэн, хэлдэг биш хийдэг, үнэн Ерөнхий сайд байна гэж хэлж байгаа тань талархалтай санагдлаа. Аж ахуйн нэгжүүдээ зайлшгүй дэмжиж, хөдөө орон нутагт ажлын байр бий болгох шаардлагатай. Татвар төлөгч иргэн, аж ахуйн нэгжийг дэмжих томоохон реформын ажил хийх хэрэгтэй байна. Татвар, нийгмийн даатгалын шимтгэлийг реформыг хийнэ гэж та хэллээ, олон нийт талархалтай хүлээж авах болов уу” гэв.  

Ерөнхий сайдад нэр дэвшигч Г.Занданшатар “Би нэг л зарчмыг баримтална. Үнэн л байхыг эрхэмлэнэ. Үнэн л байхыг боддог, байгаа маань, алдаа минь ч ил тод. Худал хуурмагаар халхавчилж худлаа ярихыг хүсэхгүй. Би ойрын хугацаанд амжуулаад төсвийн тодотголыг өргөн барина, хэмнэлтийн тодотгол хийнэ. Татвар төлдөггүй, төлдөг биш нийтээр хамрагдсан татварын баазтай болно.  Энэ бүхэн эхний ээлжийн бодитой алхам байна” гэв.