Шинжлэх ухааны тайлан сэтгүүлд нийтлэгдсэн шинэхэн судалгааны тайланд хүний биеэс шинэ эрхтэн олсон тухай өгүүлжээ. Түүнчлэн энэ шинэ эрхтэн нь хүний биеийн хамгийн том эрхтэн байж магадгүй гэсэн байна.

Анагаахын шинжлэх ухаанд эс болон эрхтэн хоорондын тусгаарлагч хэсгийг латинаар “Интерститиум” буюу “Завсар хоорондын зай” хэмээн нэрлэдэг. Харин энэ зүйлийг одоо эрхтэн хэмээн үзэх хэрэгтэй хэмээн нийтлэлд өгүүлжээ.

Нью Йоркийн Их сургуулийн Лангон Эрүүл мэндийн хүрээлэнгийн профессор Нейл Тийз “Анх бид зүгээр л сонирхолтой эс юм хэмээн гайхаж байсан хэдий ч удалгүй эрхтэн хэмээх ойлголттой холбож эхэлсэн юм. Учир нь эрхтэн гэдгийг хоёр төрлөөр тайлбарладаг. Нэгдүгээрт нэгдмэл бүтэцтэй, хоёрдугаарт нэгдмэл үйл ажиллагаатай. Харин интерститиумын хувьд аль аль шинжийг нь агуулж байсан” гэсэн аж.

Тэрээр үргэлжлүүлэн “Энэ эрхтэн магадгүй хүний арьснаас ч том хэмжээтэй байх. Арьс хүний биеийн жингийн 16 хувьтай тэнцдэг, хамгийн том эрхтэн юм. Харин интерститиумын хувьд 20 хувь буюу ойролцоогоор насанд хүрсэн хүний биеийн 10 литрийг эзэлж байж магадгүй” гэжээ.

Энэхүү судалгааны ажил нь зөвхөн шинэ эрхтэн хэмээх саналыг дэвшүүлээд зогсохгүй хорт хавдрын тархцын тухай ойлголтод шинэ дэвшил гаргана гэж үзэж байгаа аж. Учир нь хорт хавдрын эс биеэр тархахын тулд эхлээд энэ давхаргад нэвтэрч, улмаар цааш тархдаг юм байна.

Эх сурвалж: CNN