Хэрэв Ром хотоор аялж байгаа бол таны аяллын хуваарьт Колизей байж л таарна. Дөрвөн сая жуулчдыг жил бүр хүлээн авдаг энэхүү эртний тулааны талбар дэлхийн долоон гайхамшгийн нэг гэх статусаа хадгалсаар байгаа билээ.

Ромын Колизей буюу Flavian Amphitheatre нэрээр алдаршсан энэ барилга бүрэн сэргээн, судалсан дэлхийн хамгийн эртний барилгуудын нэг. Энд гүйцэтгэсэн малталт, археологийн нүсэр ажил танд Ромын эзэнт гүрнийг дахин амилуулах болно.

Олон арван мянган боол МЭӨ 70 онд 10 шахам жилийн хугацаанд Колизейг барьж дуусгажээ. Ромын бүх иргэдэд зориулан барьсан энэхүү амфитеатр нь 80,000 үзэгчийн багтаамжтай бөгөөд гладиаторын тулаан, амьтад агнах үзүүлбэрийн зориулалттай. Нуман хэлбэртэй 80 хаалга нь үзэгчдийг хормын хугацаанд суудлаа эзлэх боломж олгож, үзэгчдийн суудлын зохион байгуулалт, газар доорх амьтан, боол, гладиатор агуулах зориулалттай тасалгаанууд зэрэг нь Колизейг архитектурын хувьд өндөр зэрэглэлийн үзвэр, үйлчилгээний гайхамшиг гэдгийг батална. VIP болон нийтийн үзэгчдийн суудал зэрэг Колизейн дизайны шийдлийг өнөө үеийн спортын талбай, цэнгэлдэх хүрээлэнгүүд ашигласан хэвээр байна.

Газар доорх төөрдөг байшин шиг олон тасалгаа, хонгилыг олон жил судалсны дүнд бид МЭӨ VI зуун хүртэл үзэгчдэд үйлчилж ирсэн Колоссей хэрхэн ажиллаж, үйлчилдэг байсан тухай баялаг мэдээлэлтэй болсон. Энгийн боловч ухаалгаар шийдсэн хананы хаалт, хаалга, хөшүүргийн механизмыг ашиглан заан, арслан, баавгай, анааш, заан, ирвэс зэрэг амьтдыг нэг өрөөнөөс нөгөө рүү шилжүүлж, эцэстээ тулааны талбарт оруулдаг байж.

Дундад зууны үед Ромын оршин суугчид Колизейг янз бүрийн зориулалтаар ашиглан барилгын бүрэн бүтэн байдалд хайхрамжгүй хандаж байж. Тоосго, бетон хулгайд алдагдаж, талбайг нь амьтан, аж ахуйн зориулалтаар ашиглан өнөөх газар доорх хонгилын нүсэр систем элс, шороонд дарагджээ. Нуман хаалгууд нь худалдаачдаар дүүрсэн бол зарим нь оршин суух газар болов. Үүний дараах түймэр, газар хөдлөлтөөр дүүрэн зуунууд Колизейн хэврэг байдалд нэмэр болсонгүй. Ромын оршин суугчид үйлдвэрлэл, шашин, худалдаа зэрэг олон зориулалтаар үргэлжлүүлэн ашигласан нь Колизейн улам дордуулан, баялаг түүх нь мартагдсаар байв.

Харин XIX зууны эхэн үед эрдэмтэд түүх судлах замаар өөрсдийн амьдарч байсан цаг үеийг ойлгох хүсэл эрмэлзэл нь бадрав. Энэ үед эртний барилга, хөшөө, дурсгалаар дүүрэн Ром хот судлаачдын томоохон бай болжээ. Тэд Колизейг олон зууны турш засвар, арчилгаагүй өнгөрүүлсэн тоос шороо, өвс ногоонд баригдан эргээд байгалийн нэгэн хэсэг болсон нуранги дээр очсон байна. Хачирхалтай нь зарим ургамлын төрөл нь Африк гаралтай байсан нь тухайн үед энд тулаанд алагдсан амьтдын үлдэгдлээс үүсэлтэй гэж тайлбарладаг. Ийнхүү Колизейг дахин сэргээх ажил 100 гаруй жил үргэлжлэв.

Өнөөдөр зочид бүтэн зууныг хамарсан засан сэргээлтийн ажил болон судалгааны үр дүнг сонирхож болно гэсэн үг. Флавианы эзэнт гүрний үеийн томоохон тэмцээн ямар сүр дуулиантай зохион байгуулагддаг байсныг Колизейн нэг талд барьсан модон тавцангаас сонирхож болно. Тухайн үеийн үзэгчид хэрхэн, хаанаас үзэж байсныг эндээс мэдрээрэй. Колизейн архитектурын гайхамшиг гаднаа ч, дотноо ч хоёр мянганы өмнөх шигээ сэргээсэн бөгөөд засварчид хойч үедээ энэ байдлаар нь хадгалахаар ажилласаар байгаа юм.

Woovoo аппликейшнийг татах: 

Woovoo Facebook хуудас

www.woovoo.com