МҮХАҮТ-ын ээлжит бус XXII их хурал арваннэгдүгээр сарын 28-ны өдөр болсон. Энэ хурлаар МҮХАҮТ-ын Ерөнхийлөгчөөр “Цахим байшин” ХХК-ийн ТУЗ-ийн гишүүн Л.Төр-Одыг сонгосон юм.

Энэхүү хуралд нийт 1395 саналын эрхтэй гишүүнээс хурал эхлэхэд 704 гишүүн буюу 50.47% бүртгүүлэн оролцсон нь МҮХАҮТ-ын дүрмийн 6.5-д заасан ирцийн шаардлагыг хангасан.

Хурлын ирц хүчин төгөлдөр болсныг баталгаажуулах томъёоллоор санал хураахад нийт оролцогчдын  701 гишүүн мандат өргөн дэмжиж, түдгэлзсэн гишүүн байхгүй, татгалзсан томъёоллоор санал хураахад 3 гишүүн мандат өргөсөн. Иймд мандатын комисс Танхимын дүрмийн 6.5-д заасны дагуу их хурлын ирц хүчин төгөлдөр болсныг үүгээр баталгаажуулав.

Эхний санал хураалтаар нийт 637 саналын хуудас тоологдсоноос МҮХАҮТ-ын Ерөнхийлөгчид нэр дэвшигч

•     Лхагважавын Төр-Од 237 (37.3%),
•     Цагаачийн Баатарсайхан 173 (27.2%),
•     Баатаржавын Лхагважав 103 (16.2%),
•     Боожоогийн Лакшми 77 (12.1%),
•     Түмэнжаргалын Дүүрэн 36 (7%),
•     Шоовдорын Төмөрсүх 7 (1.1%),
•     Цэндийн Майдар 3 (0.5%) гишүүний санал авсан.
•     Хүчингүй болсон саналын хуудас-1

Улмаар нэр дэвшигчдийн хэн нь ч 50-иас дээш хувийн санал авч чадаагүй тул хамгийн их санал авсан хоёр нэр дэвшигчийн дунд хоёр дахь санал хураалт явуулав. Хоёр дахь санал хураалтад нийт 514 саналын хуудас тоологдсоноос МҮХАҮТ-ын Ерөнхийлөгчид нэр дэвшигч

•     Лхагважавын Төр-Од 276 (54%),
•     Цагаачийн Баатарсайхан 236 (46%) гишүүний санал авсан юм.
•     Хүчингүй болсон саналын хуудас-2

Эх сурвалж: МҮХАҮТ