Санхүүгийн дансны алдагдал өмнөх оны мөн үеэс 14.4 дахин нэмэгдэв.

Нэгдүгээр сарын урьдчилсан гүйцэтгэлээр Монгол Улсын төлбөрийн тэнцэл 86 сая ам.долларын алдагдалтай гарсныг Монголбанк мэдээллээ. Энэ нь өмнөх оны мөн үетэй харьцуулахад 146 сая ам.доллароор нэмэгдсэн дүн болж байна.

Төлбөрийн тэнцэл алдагдалтай гарахад урсгал дансны тэнцэл 309.65 сая ам.долларын алдагдалтай гарсан нь нөлөөлж байгаа аж. Мөн шууд хөрөнгө оруулалт хэлбэрээр 264 сая ам.долларын гүйлгээ бүртгэгджээ.

Урсгал дансыг голлох үзүүлэлтүүдээр харахад барааны данс 265.61 сая ам.долларын ашигтай, тээвэр, аяллын данс тус бүр алдагдалтай гарсан байна. Мөн нэгдүгээр сард Монгол Улсын хилээр орсон болон гарсан жуулчдын урсгалаас харахад өмнөх оны мөн үетэй харьцуулахад нэмэгдсэнийг ИНЕГ мэдээлсэн юм.

Худалдааны хувьд бараа эргэлт нэмэгдэж, 2.6 тэрбум ам.доллар давжээ. Үүнд удаан эдэлгээтэй бараа, нефтийн бүтээгдэхүүний импорт нэмэгдсэн нь нөлөөлсөн байна. Төлбөрийн тэнцлийн бусад дансыг харахад санхүүгийн данс 460.36 сая ам.долларын алдагдалтай гарсан нь өмнөх оны мөн үеэс 14.4 дахин нэмэгдсэн үзүүлэлт боллоо.