-GoGo.mn  сайтад уншигчаас ирсэн захидлыг хүргэж байна- 

Энэхүү мэдээллийг мэргэшсэн нягтлан бодогч, санхүүгийн зөвлөх Ц.Алтанхуяг бэлтгэн илгээв. 

НӨАТ буюу Нэмэгдсэн өртгийн албан татвар нь хэрэглэгч рүү чиглэсэн татвар юм. Та идэж, ууж, өмсөж байгаа бол төлөх ёстой татварын нэг төрөл.

2016 оноос татварын суурийг өргөтгөх, далд эдийн засгийг ил болгох зорилгоор НӨАТ-ын урамшууллын 2%-ийг хуульчилсан. Энэ нь ч зохих үр дүнгээ өгсөн бөгөөд УИХ-ын дарга Г.Занданшатар НӨАТ-ын урамшууллыг таван хувь болгох санал гаргаж, шүүмжлэл дагуулав. Уг санал зөв боловч дутуу боловсруулсан санаачилга байсан гэж санхүүгийн зөвлөхийн хувиар бодож байна. 

Өөрчлөх боломжтой санал нь урамшууллыг 1-7 хувь болгож ангилах нь зүйтэй юм. Жишээлбэл:

• Нарантуул гэх мэт гадаа худалдаа эрхэлдэг иргэд, ААН-ээс худалдан авалт хийвэл 7%-ийн НӨАТ-ийн урамшуулалтай, 
• Дүнжингарав, Шөнийн зах мэт лангуутай иргэд, ААН-ээс худалдан авбал хийвэл 5%, 
• Жижиг дэлгүүрүүдээс худалдан авалт хийвэл 3%
• Том дэлгүүрээс худалдан авалт хийвэл 2%
• Тансаг зэрэглэлийн дэлгүүрээс  худалдан авбал 1%
• Баар ресторан 1% урамшуулалтай болгох гэх мэт. 

Энэ мэтээр борлуулагч нараа ангилан, НӨАТ-ын  буцаан олголтын  урамшууллыг  шатлалтай болговол тэнцвэрт байдал үүснэ.

Далд эдийн засаг гээд байгаа жижиглэн худалдаа эрхлэгч, баримт олгодоггүй  худалдан борлуулагч  нар татварт бүрэн хамрагдахад бодитойгоор нөлөөлөх  том хөшүүрэг болно. Хэрэгцээг ангилах бус борлуулагч нарыг ангилах хэрэгтэй.

Мөн үндэсний үйлдвэрлэгчийн бараа авбал НӨАТ буцаан олголт 7 хувь гэх мэтээр өндөр тогтоож, дотоодын ААН-ээ дэмжих боломжтой. Татварын суурийг өргөтгөх, далд эдийн засгийг ил  болгох зэрэг  НӨАТ-ын  үндсэн зорилго биелж, нөгөө талдаа төсөвт дарамт болохгүй гэсэн саналтай байна.