Олон улсын нотариатын холбоо (ОУНХ) нь дэлхийн нотариатын байгууллагуудын үйл ажиллагаа, чиг үүрэг, хамтын ажиллагааг дэмжих зорилго бүхий  төрийн бус байгууллага юм.

Жил бүрийн 10 дугаар сарын 02-ны өдөр Олон улсын Нотариатын Холбооны гишүүд дэлхийн “Нотариатчийн өдөр”-ийг тэмдэглэдэг. 1948 оны эл өдөр Аргентин улсын Буэнос Аэрис хотод Латин хэлбэрийн нотариатчдын олон улсын чуулган зохион байгуулагдаж, ОУНХ-г анх үүсгэн байгуулагдсан аж. 

Анх 19 улс орны санаачилгаар үүсгэн байгуулагдсан тус холбоо нь эдүгээ 87 улс орны гишүүнчлэлтэй ба Европын Холбооны 28 гишүүн орны 22 улсыг, „Их 20“-ийн бүлгийн 19 улсыг тус тус өөртөө багтаасан хүчирхэг байгууллага болон өргөжсөн байна. 

Тус байгууллага нь эдийн засгийн тогтвортой байдлын хангах, хөрөнгө оруулалтыг дэмжих, мөнгө угаах, терроризмийн гэмт хэрэгтэй тэмцэх болон ядуурлыг бууруулах зэрэг дэлхийн нийтийн анхааралд байдаг томоохон үйл ажиллагаанд оролцдог ба Дэлхийн Банкны нэгдэлд хамаарах Сэргээн Босголт, Хөгжлийн Олон Улсын Банк, Олон Улсын Хөгжлийн Агентлаг гэх мэт олон улсын байгууллагуудтай хамтын ажиллагаатай байдаг.

Монгол Улсын Нотариатчдын Танхим 2013 онд  тус Холбооны 83 дахь гишүүн орноор элссэн бөгөөд жил бүр олон улсын хурал, чуулга уулзалтад Монгол улсын нийт нотариатчдын эрх ашгийг төлөөлж оролцдог, Олон Улсын Нотариатын Холбооны төдийгүй түүний Азийн Хэрэг Эрхлэх Комиссийн идэвхтэй гишүүнд тооцогдон ажиллаж байна.

Монголын Нотариатчдын Танхим