Нийслэлийн Аялал жуулчлалын газар Байгаль орчин, аялал жуулчлалын яам, Улаанбаатар Аялал жуулчлалын холбоотой хамтран “Улаанбаатар травэл экспо-2023” олон улсын аялал жуулчлалын үзэсгэлэн зохион байгуулна. Үзэсгэлэн тавдугаар сарын 19-21-нд “Мишээл экспо” төвд болох бөгөөд ес дэх жилдээ зохион байгуулж буй юм.

Тус үзэсгэлэн нь жилээс жилд цар хүрээгээ тэлж, 21 аймгийн төлөөлөл оролцох болсон. Тэд нутгийнхаа шинэ бүтээн байгуулалт, бүтээгдэхүүн үйлчилгээ, зорин очих онцлох газруудын маршрут, үйлчилгээний байгууллага, аялал жуулчлалын бүтээгдэхүүн үйлдвэрлэгчид зэрэг бүхий л мэдээллээ олон нийтэд, аялал зохион байгуулагч тур оператор, агентуудад сурталчлан танилцуулдаг.

Мөн дотоод, гадаадын аялал зохион байгуулдаг тур оператор, авиа компаниуд аяллын бараа бүтээгдэхүүн, үйл ажиллагаагаа сурталчлан борлуулалт хийхийн зэрэгцээ монголчуудын аялах, очиж амрах дуртай гадаадын улс орнуудаас аялал жуулчлалын байгууллагууд өргөн бүрэлдэхүүнтэй ирж оролцдог болсон.

Энэ үеэр иргэд, аялагч та бүхэн мэргэжлийн байгууллагаар дамжуулан аяллаа төлөвлөх, аялагчдын хүсэл сонирхолд нийцсэн аяллын хөтөлбөр, багцуудтай танилцах, сонголтоо хийх, захиалгаа хямдралтай үнээр өгөх болон аялал жуулчлалын байгууллагууд, үйлчилгээ эрхлэгчдийн мэдээллийг нэг дороос хүртээмжтэй байдлаар авах боломжтой.

Тус үзэсгэлэнг анх удаа олон улсын шинж чанартайгаар зохион байгуулж байгаа бөгөөд Цайны замын олон улсын аялал жуулчлалын гишүүн байгууллагуудын санал солилцох уулзалтууд болно. Уулзалтад мөн ОХУ, БНХАУ-ын гишүүн хотуудын аялал жуулчлал хариуцсан байгууллагуудын төлөөлөл оролцож, гурван орны аялал жуулчлалын хамтын ажиллагааг өргөжүүлэх талаар санал солилцох юм.

Эх сурвалж: Нийслэлийн аялал жуулчлалын газар