MMCG судалгааны компани “Chief marketing officer” буюу CMO судалгааг 2018 оноос хоёр жил тутам хийж эхэлжээ. Тэдний энэ удаагийн гурав дахь тайлангийн мэдээллийг танилцуулах эвентэд Монголын топ 50 компанийн маркетинг хариуцсан удирдлагуудыг оролцсон юм.

Үйл ажиллагааны эхэнд MMCG судалгааны компанийн гүйцэтгэх захирал Д.Бум-Эрдэнэ гаднын томоохон судалгааны байгууллагуудын глобал маркетинг болон хэрэглэгчийн трендийг танилцуулах судалгааны талаар илтгэл тавив. Тэрбээр илтгэлээ эхлэхээсээ өмнө “Энэхүү эвент та бүхний тоон мэдээллийн цангааг бүрэн тайлна” хэмээсэн нь тус эвентийн ерөнхий агуулгыг товч бөгөөд тодорхой илэрхийлсэн зангилаа байлаа.

Глобаль маркетинг трендийг Gartner, Deloitte компани хийдэг бөгөөд 2023 оны онцлох үр дүнгээс товчилбол:

• Хэрэглэгчийн замнал, контент, бүтээгдэхүүн, үйлчилгээг хүргэхдээ AI буюу хиймэл оюун ухаанд суурилах нь гол тренд болж байна.
• Маркетингт шинээр орж ирж буй чухал үг PERSONALISATION.
• 2025 он гэхэд маркетингийн нийт функцийн 75 хувь нь AI-д суурилна.
• Тухайн контент хуурамч эсэхийг шалгадаг мониторинг системд компаниуд анхаарч эхэлнэ.
• Хүмүүс зар сурталчилгаагүй контент үзэхэд мөнгө төлнө.
• Контентын үнэ цэн өснө.
• Брэндүүд маркетингийн төсвөө бууруулахгүй.
• Тогтвортой хөгжлийн асуудалд анхаарна.  

Эхний илтгэлийн дараа СМО судалгааны ерөнхий үр дүнгээс танилцуулав. Судалгааг дараах чиглэлээр үйл ажиллагаа явуулдаг топ 50 байгууллагын СМО-г сонгожээ.

• Барилга
• Банк, санхүү
• Мэдээлэл технологи
• Даатгал
• Авто
• Үүрэн оператор
• Эрүүл мэнд
• Шингэн хүнс үйлдвэрлэл
• Худалдаа, үйлчилгээ
• Түргэн хоолны үйлчилгээ
• Хүнс үйлдвэрлэл
• FBCG
• Сүлжээ дэлгүүр

Монголын маркетингийн салбарын одоогийн нөхцөл байдал, маркетерууд цаашдын трендийг юу гэж үзэж байгааг судалгааны үр дүн харуулжээ. Ерөнхий мэдээлэлд, Маркетингийн салбарт маш их өөрчлөлт орсныг тодотгов.

Онцлоход:

• Ковидын дараах зах зээлийн хөдөлгөөн дийлэнх салбарт эерэг нөлөөлжээ.
• Зах зээл хумигдах магадлалтай байна.
• Нийт маркетингийн төсөв нэмэгджээ.
• Компаниуд маркетингийн зардлаа өсгөнө.

Уг судалгааны дэлгэрэнгүй мэдээллийг ЭНД дарж авна уу.

БҮТЭЭГДЭХҮҮНЭЭ АЛЬ СУВАГ ДЭЭР БАЙРШУУЛАХ ВЭ ГЭДГИЙГ СУДАЛГААТАЙ ХАРЖ ҮЗЭХ НЬ МАШ ЧУХАЛ

-MMCG судалгааны компанийн гүйцэтгэх захирал Д.Бум-Эрдэнэ:
-Компаниуд брэнддээ зориулаад ирэх жилийн бодлогоо хэрхэн тодорхойлох, ковидын дараа хүмүүсийн зан төлөв өөрчлөгдсөнийг дагаад маркетинг, урамшууллын бодлого хэрхвэл зүгээр бол зэргээр өрнүүн яриа өрнөлөө. Банк, санхүү, мобайл, үйлдвэрлэл зэрэг бүх чиглэлийн хүмүүс өөрсдийн асуудлаа ярилцсан эвент болов.

-Энэ удаагийн судалгааны онцлох үр дүнгээс дурдвал?
-Медиа хэрэглээ маш их баялаг болсон. Инфляц зэрэг эдийн засгийн үр нөлөөлөл одоо гарах гэж байх шиг байна. 2022 оны эхэн үед ковидын дараах хөдөлгөөний үр дүнд зах зээл сайжирсан. Харин 2022 оны хоёр дахь хагасаас муудаж эхэлсэн. Энэ байдал нь 2023 онд ч үргэлжлэх хандлагатай харагдаж байна.

Тиймээс төсвөө хэмнэж буй байгууллагууд маркетинг, үнийн бодлогоо яаж явуулах уу, асуудалд хэрхэн гаргалгаа үүсгэх гэдэг нь гол үр дүн болж байна.

Медиа хэрэглээ их олон талт болсон талаар дээр дурдсан. Тэгэхээр бүтээгдэхүүнээ аль суваг дээр байршуулах вэ гэдгийг судалгаатай харж үзэх нь маш чухал юм.

БҮТЭЭГДЭХҮҮН, ҮЙЛЧИЛГЭЭГ АНХ БИЙ БОЛГОХООС ЭХЛЭЭД ЭЦСИЙН ШАТАНД ХҮРТЭЛ МАРКЕТИНГИЙН ҮЙЛ АЖИЛЛАГАА ИЖ БҮРЭН ЯВАГДАХ ШААРДЛАГАТАЙ

-Монголын Маркетингийн холбооны ерөнхийлөгч Ш.Алтанбагана:
-Сүүлийн хоёр жил ковидын улмаас дэлхий даяар эдийн засаг удааширсан үе тохиолоо. Ковидын дараа, дижитал шилжилтийн үед бизнесүүд, хэрэглэгчид маш их өөрчлөгдөж байна. Хэрэглэгчдийн амьдралын хэвшил өөрчлөгдөж байна. Тиймээс брэндүүд цаашид шинэ орчинд хэрхэн дасан зохицох, бүтээгдэхүүн үйлчилгээ ямар байх уу, дижитал орчинд хэрэглэгчтэйгээ яаж харилцах уу, ер нь хэрэглэгчид хаана байна, шинээр юуг хүргэх ёстойгоо дахин тодорхойлох ёстой.

Тиймээс маркетингийн үйл ажиллагаа зөвхөн хэрэглэгчидтэй харилцах биш, бүтээгдэхүүн, үйлчилгээг анх бий болгохоос эхлээд эцсийн шатанд хүртэл маркетингийн үйлчилгээ иж бүрэн явагдах шаардлагатай болж байна. Тиймээс маркетингийн чиг үүрэг их өөрчлөгдөж байна.  

Түүнчлэн үйл ажиллагааны дараагийн хэсэгт “Монголчуудын медиа хэрэглээ, амьдралын хэв маягийн судалгаа 2023”-аас “амтлуулав”. Тухайлбал, энэ жилийн судалгаанд илүү өргөн цар хүрээг хамруулж, олон талт медиа сувгийн онцлог, өндөр орлоготой бүлгийн медиа хэрэглээний ялгаатай байдлыг тодруулжээ.

Үүнээс гадна медиа хэрэглээг зөвхөн хэрэглэгч талаас нь харахаас гадна зар сурталчилгаа нийлүүлэгч ТОП-50 компанийн үнэлгээг нэгтгэн харуулснаараа шинэлэг юм. Онцлох үр дүнгээс хуваалцахад:

• Олон талт болж буй медиа хэрэглээний өөрчлөлт
• Ковидоос хойших хэрэглэгчийн трендийн өөрчлөлт
• Gen Z, Y, X амьдралын хэв маяг
• 300+ төрлийн уламжлалт болон шинэ дижитал медиа сувагт хандах хандлага
• Есөн жилийн харьцуулсан үр дүн
• Dashboard тайлан

Уг судалгааны талаарх дэлгэрэнгүйг ЭНД дарж үзнэ үү.