Хиймэл оюун ухаант "ChatGPT" программ томоохон их сургуулиудын төгсөлтийн шалгалтыг давжээ. Тодруулбал "OpenAi"-аас бүтээсэн тус шинэ автомат хариулагч Миннесотагийн их сургуулийн хуулийн сургууль болон Пенсильванийн их сургуулийн Вартон бизнесийн сургуулийн дөрвөн курсийн шалгалтад тэнцсэн байна.

Миннесотагийн их сургуулийн хуулийн сургуулийн профессоруудын туршилтаар ChatGPT олон хариулттай 95, эсээний 12 асуултад хариулж C үнэлгээ авсан байна. Энэ нь их сургуулийн түвшинд дундаж үзүүлэлт боловч шалгалтад тэнцэхэд хангалттай аж.

Харин Вартоны бизнесийн сургуулийн шалгалтад B үнэлгээ авчээ. Тус сургуулийн профессор Кристиан Тервейш "ChatGPT менежмент болон анализын ерөнхий асуултуудад асуудалгүй хариулсан ч математикийн тооцоолол дээр алдаа гаргасан" гэв.

Энэхүү шинэ технологийг сурагчид шалгалтад ашиглан, хууран мэхэлж байгаа нь их сургуулиудын санааг зовоож буй бөгөөд Австралийн их сургуулиуд шалгалтаа цаасаар авахад хүрсэн билээ.

2022 оны арваннэгдүгээр сард нээлттэй болсноос хойш ChatGPT эсээ, түүх бичиж, шүлэг дуу зохион, мэйл хүртэл бичиж олныг гайхшируулсаар байна.

Хиймэл оюун ухааныг хэрэглэгчийн асуултад хариулж сургахын тулд маш их мэдээлэл цуглуулж өгөгдлийн сан бий болгосон бөгөөд зарим мэдээлэл ташаа байвал нийтэд хор уршигтай байж болзошгүй юм.

Эх сурвалж: CNN