Иран дахь улс төрийн үймээний сүүдэр "Катар 2022" хөл бөмбөгийн дэлхийн аварга шалгаруулах тэмцээний дэвжээнд тусаж байна.

Энэ оны есдүгээр сард 22 настай Махса Амини охин Ираны уламжлалт хувцас болох хижабыг өмсөөгүйн төлөө шоронд хоригдсон. Түүнийг Ираны хэв журам сахиулах цагдаа баривчилсан бөгөөд хоригдсоноос хэдхэн хоногийн дараа зодуулсан байж болзошгүйгээр өөд болсон юм.

Энэхүү эмгэнэлт явдал Иранд хүний эрх, эмэгтэйчүүдийн эрх чөлөөний төлөөх бослогыг дэгдээж өнөөдрийг хүртэл гурав дахь сардаа үргэлжилж байна.

Ираны томоохон хотуудад олон мянган хүнийг хамарч цөөнгүй хүн амь үрэгдээд буй бослого, үймээний сүүдэр Катарт туссаар байна.

Тодруулбал Ираны шигшээ баг ДАШТ-ийн нээлтийн тоглолтоо Англитай хийсэн. Тоглолтын өмнө багуудын төрийн дуулал эгшиглэдэг уламжлалтай бөгөөд Ираны тамирчид төрийн дууллаа дуулахаас татгалзан чимээгүй зогсож эх орондоо болж буй "харгислал"-ыг эсэргүүцсэн юм.

Шигшээ багийн тоглогч Сардар Азмун өөрийн сошиал хуудсандаа эсэргүүцлээ илэрхийлсний улмаас ДАШТ-д оролцох багт багтахгүй байж болохуйц нөхцөл хүртэл үүсээд байв.

Түүнчлэн Катарт очсон Ираны хөгжөөн дэмжигчид "Эмэгтэйчүүдийн эрх, Эрх чөлөө, Хүний эрх" гэсэн утгатай уриа, бичгүүдийг барьжээ.

Тэдний нэг нь өнөөдөр Уэльсийн эсрэг тоглолтын үеэр Махса Аминигийн дурсгалд зориулж 22 дугаартай шигшээ багийнхаа өмсгөлийг барьсан байв. Түүний цусаар уйлж байгаа мэт нүүр будалт нь Иранд болж үймээн эмэгтэйчүүдэд хэрхэн тусаж байгааг илтгэж байлаа. Харамсалтай нь түүний барьсан өмсгөлийг цэнгэлдэх хүрээлэнгийн хамгаалалтын алба хураажээ.

Эх нутгаасаа өөр газар ажиллаж, амьдардаг Иранчууд Катарын цэнгэлдэх хүрээлэнгүүдэд дуу хоолойгоо илэрхийлж, шигшээ багаа дэмжиж байна. Гэвч Ираны засгийн газрыг дэмждэг хүмүүс Катар дахь эсэргүүцэгчдийг дарамталж байгаа талаар хэвлэлүүд мэдээлэв.

Өнөөдрийн байдлаар Иран дахь үймээний улмаас 400 орчим хүн амь үрэгдэж 1000 орчим хүн гэмтжээ.