Монголбанкны Хяналтын зөвлөлийн ээлжит хурал энэ сарын 9-нд болжээ. Тус хурлаар Монголбанкны 2014 оны санхүүгийн тайланд “Эрнст энд Янг Монголия Аудит” компаниас аудит хийж гаргасан дүгнэлт, зөвлөмжтэй танилцаж, санхүүгийн тайланд Монголбанкны Хяналтын зөвлөлөөс өгөх санал, зөвлөмжийн талаар гишүүн Д.Нямаагийн сонсголыг хэлэлцсэн байна.

 Мөн Хяналтын зөвлөлийн 2015 оны шийдвэрийн биелэлтийн хагас жилийн дүн, зөвлөлийн 2016 оны төсвийн төслийн талаар  мэдээлэл сонсчээ.

Ингэхэд Монголбанкны удирдлагын бэлтгэсэн болон аудитлагдсан санхүүгийн тайлангийн зарим үзүүлэлтийн дүн зөрүүтэй байжээ. Энэ асуудалд болон мэдээллийн технологийн, дотоод хяналт, мониторингийн системийг сайжруулахад анхаарч ажиллах, Монголбанкны өөрийн хөрөнгийн сөрөг дүнг хууль тогтоомжийн дагуу УИХ-д оруулж шийдвэрлүүлэх зэрэг зөвлөмж гарган, Монголбанкны Ерөнхийлөгчид болон УИХ-ын Байнгын хороонд хүргүүлэхээр тогтов хэмээн Монголбанкны хяналтын зөвлөлөөс мэдээллээ.