Өнгөрөгч долоо хоногийн бямба гаригийн УИХ-ын нэгдсэн чуулганы хуралдаанаар Монгол Улсын Их хурлын сонгуулийн тухай хуульд өөрчлөлт оруулах тухай хуулийн төслийг баталлаа. Энэ талаарх мэдээллийг уг хуульд өөрчлөлт оруулах тухай хуулийн төслийг боловсруулсан УИХ-ын гишүүн Д.Дондогоос тодруулсан юм.

-Монгол Улсын Их хурлын сонгуул ийн тухай шинэ хууль хэрэгжсэнээр Сонгуулийн ерөнхий хороо сонгууль явуулах саналаа УИХ-д хэзээ оруулж ирэхээр болов?
-Сонгуулийн ерөнхий хороо нь 30 хоногийн дотор сонгуулийн товыг төсвийн хамт УИХ-д оруулж ирнэ. УИХ Сонгуулийн ерөнхий хорооноос оруулж ирсэн саналыг 14 хоногийн дотор багтаан шийдэж, сонгууль болох товыг зарлана. Өөрөөр хэлбэл, УИХ сонгуулийн хугацааг зарласнаас хойш 90 хоногийн дотор сонгууль болоод өнгөрөх ёстой. Тодруулбал, УИХ тэдний өдрөөс эхлэн сонгууль болно гэж зарлана. Зарласан өдрөөс хойшхи 30 хоногийн дотор санал хураалт болж өнгөрнө. Ийм маягаар нийтдээ 120 хоногийн хугацаанд сонгуулийг зохион байгуулаад дуусгах ёстой.

-Чингэлтэй дүүргийн нөхөн сонгуулийн асуудлыг Сонгуулийн ерөнхий хороо хэдийд УИХ-д оруулж ирэх бололцоотой вэ?
-Сонгуулийн ерөнхий хороо 30 хоногийн дотор саналаа оруулж ирнэ гэдэг утгаараа УИХ-ын чуулганы завсарлага таарчихаж байгаа. Тийм учраас чуулган завсарлахаас өмнө СЕХ саналаа оруулж ирэхээр болж байх шиг байна, Тэгвэл УИХ энэ долоо хоногт Чингэлтэй дүүргийн нөхөн сонгуулийн товыг тогтоогоод өгчихнө. Ингэхдээ хэднээс эхэлж, зарлах вэ гэдгийг санал хураах өдөртэй нь хамт зарлах байх.