Хүнийг зөвхөн нүдэнд харагдах махан биеэс тогтоно гэсэн үзэл баримтлал нэгэнтээ өөрчлөгдөж хүн үзэгдэх бие болох махан бие, үл үзэгдэх бие болох аурагаас тогтоно хэмээн үздэг боллоо. Аура нь бидний нүдэнд харагдахгүй, махан биеийг тойроод өндгөн хэлбэртэй бүрхэж байдаг аж. Аура нь хүний махан биетэй нийлээд долоон давхаргатай.

Үүнд: физик буюу махан бие, эфир бие, астраль бие, менталь бие, казуаль бие, будхи бие, атми бие зэрэг орно. Аурагийн цацруулж буй энергийн цар хүрээ нь хүний амьдралын ахуй, бодол санаа, сэтгэлийн тухай мэдээллийг агуулдаг гэнэ.

Мөн гэрлэн бүрхүүл нь хүний ухаан, бие махбодь, сэтгэл зүй, эрүүл мэндийг фото зураг мэт буулгадаг аж. Төрөлхийн гоц чадвартай хүмүүсийн гэрлэн бүрхүүл нь маш тод байдаг. Зарим сод хүмүүсийн гэрэлт хүрээ нь ердийн цагт ч жирийн хүнд үзэгдэхүйц байдаг байна.

Тийм хүнийг "гэгээрсэн", "тодорсон", "гэгээн" хэмээн нэрлэдэг. Буддагийн гэрлэн бүрхүүл хэдэн километрийн зайд тархаж байжээ. Мөн аура нь хүний бие эрүүл, өвчтэй эсэх, өвчтэй бол ямар өвчтэй, амжилт, уналт, хайр, үзэн ядалт бүхнийг харуулна. Түүнчлэн аура нь өнгөрсөн, одоо, ирээдүйн мэдээллийг хадгалдаг банк гэж зарим эрдэмтэд үзжээ.