Монголын хилтэй ойролцоо орших Сибирийн усан цахилгаан станцид осол гарсны улмаас одоогийн байдлаар 70 гаруй хүн өртсөн гэж тооцоолж байгаа бөгөөд зарим ажилчдыг эрж хайх ажил хийгдэж эхэлсэн байна.

Даваа гарагт амиа алдсан хүний арван нэгэн цогцсыг олж тогтоосон юм. 1978 онд ашиглалтанд орсон Оростоо томоохонд тооцогддог уг усан цахилгаан станцын өндөр хүчдэлийн цахилгаан үүсгэвэр дэлбэрсний улмаас үйлдвэрийн дээвэр нурж томоохон хэмжээний ослын шалтгаан болжээ. Осол гарах үеэр тэнд шөнийн ээлжний 68 ажилчид ажлын байрандаа байсан байна. Үйлдвэрийн нуранги доороос амьд үлдсэн хүмүүсийг эрж хайхаар 150 гаруй аврагчид ажиллаж байна.

Ерөнхийлөгч Медведев нөхцөл байдалтай танилцуулахаар хэд хэдэн албаны хүмүүсийг тухайн газарт илгээсэн бөгөөд ерөнхий сайд Путин осолд өртсөн хүмүүсийн ар гэрт бүх талаар дэмжлэг үзүүлнэ гэдгээ мэдэгдсэн байна. Ослын дараагаар ойролцоох хэд хэдэн орон сууц болон үйлдвэрийн цахилгаан тасалдсан бөгөөд үйлдвэрийн бусад цооног, далан сэдэрч нурах вий хэмээн оршин суугчид сэрэмжилж байна. Красноярскийн Гамшигтай тэмцэх төвийн даргын хэлж буйгаар оршин суугчдыг нүүлгэн шилжүүлэх шаардлага байхгүй, цахилгаан станцын бусад хэсгүүдийг сэргээн засварлах ажил хийгдээд эхэлсэн хэмээн тайтгарууллаа. Гэвч сэргээн засварлах ажилд дор хаяж дөрвөн жил шаардлагатай ажээ. Засгийн газраас уг станцыг хүйтний улирлаас өмнө даруй засварлаж хэвийн үйл ажиллагаанд нь оруулахыг даалгажээ.