Туулайг бүжин байхаас нь тэжээвэл илүү үр дүнтэй, ашигтай байдаг гэнэ. Тэдний хоолыг зөвхөн луувангаар хязгаарлаж болохгүй.

Шинэ соргог өвс ногоо, овьёос, хивэг, байцаа бүгд туулайны идэх дуртай хоол юм. Хамгийн гол дутагддаг зүйл нь С аминдэм бөгөөд үүнийгээ хоол тэжээлээр дамжуулж авдаг. Тиймээс С аминдэмээр баялаг хүнсний зүйл өгөх хэрэгтэй.

Гэрийн нөхцөлд тэжээхэд хамгийн тохиромжтой амьтны нэг нь туулай. Тун цэвэрхэн амьтан. Амьдралын тусгай нөхцөл нэг их шаардаад байдаггүй. Түүнд бяцхан төмөр тор байхад л хангалттай. Торыг нь ойр ойрхон цэвэрлэхэд л болно. Түүнийг заримдаа өрөө тасалгаандаа чөлөөтэй гүйлгэж байвал сайн.

Зуны цагт гадаа гаргаж, зүлэг ногоон дээгүүр гүйлгэж байх нь чухал. Туулайг аймхай амьтан гэдгийг хүн бүр мэднэ. Тиймээс түүний дэргэд чанга дуугарах, хашгирах хэрэггүй. Тэд танил бус үнэр, чимээнээс айх ба танихгүй хүнд хэзээ ч ойртохгүй. Тиймээс та өөртөө дастал нь хэсэг хугацаанд хүлээх хэрэгтэй.

Туулайг багаас нь тэжээвэл дасахдаа амархан. Гэрт эвгүй үнэр ялгаруулдаг хэмээн зарим хүмүүс амьтан тэжээхээс зайлсхийдэг. Энэ нь хүмүүс торны ёроолд дэвсэх зүйлээ буруу сонгосноос болдог. Амьтны дэлгүүрт тусгай зориулалтын элс, үртэс худалдаалдаг. Мөн туулайг усанд оруулахад зориулсан угаагч, шингэн саванг худалдаалах болсон. Туулайг уснаас гаргасныхаа дараа биеийг нь хаттал арчиж, дулаахан газар байлгах нь чухал.