Монгол, Япон Улс хооронд дипломат харилцаа тогтоосны 50 жилийн ойд зориулсан “ИХ ХУРАЛДАЙ” симпозиум Гадаад харилцааны яаманд өнөөдөр боллоо.

Хурлын нээлтэд Гадаад харилцааны сайд Б.Батцэцэг, Японы Төлөөлөгчдийн танхимын гишүүн, тус танхим дахь Япон, Монголын найрамдлын бүлгийн дарга Хаяаши Мотоо нар мэндчилгээ дэвшүүлэв.

“Япон-Монголын хамтын ажиллагаа”, “Парламентын гишүүд хоорондын харилцааны өнгөрсөн ба ирээдүй”, “Япон Улс, Монгол Улсын хооронд дипломат харилцаа тогтсон түүх”, “Эдийн засгийн харилцааны өнөөгийн байдал, хөгжлийн боломж”, “Иргэдийн харилцааны өнөөгийн байдал ба хэтийн төлөв, идэвхжүүлэх арга замууд”, “Залуучуудын харилцан ойлголцлыг дэмжих” зэрэг сэдвээр илтгэл, хэлэлцүүлэг зохион байгуулжээ.

Монгол-Японы найрамдал, хамтын ажиллагааны байгууллагуудын санаачилгаар “Их хуралдай”-г манай улсад гурав дахь удаа зохион байгуулж байна.
МҮХАҮТ-ын Ерөнхий нарийн бичгийн дарга С.Баясгалан Монгол-Японы эдийн засгийн харилцааны өнөөгийн байдлыг танилцуулжээ.

2020 оны байдлаар Японы хөрөнгө оруулалттай 670 компани үйл ажиллагаа явуулдаг.

Эдийн засгийн түншлэлийн хэлэлцээр (ЭЗТХ) хэрэгжиж эхэлснээс хойш буюу 2016 оноос хойш 100 орчим компани манай улсад хөрөнгө оруулсан байна.

Нийт хөрөнгө оруулалтын 45 хувь нь худалдаа, нийтийн хоолны салбарт, 14 хувь нь барилгын салбарт тус тус ногдоно.

ЭЗТХ хэрэгжиж эхэлснээс хойш Японы хөрөнгө оруулалт нийт дүнгээрээ байнга өссөн ч 2020 онд цар тахлын нөлөөгөөр хөрөнгө оруулалтын жилийн дүн, компанийн тоо буурчээ.

Мөн хэлэлцээр хэрэгжиж эхэлснээс хойш Япон руу экспортолдог бүтээгдэхүүнд олгох гарал үүслийн гэрчилгээний тоо тогтмол нэмэгдэн, 2019 онд хамгийн олон буюу 2016 оноос 98 хувиар өссөн.

ЭЗТХ цар тахлаас үүдэлтэй эдийн засгийн хямралаас шалтгаалан хоёр улсын хүлээж байсан үр дүнд хүрч чадаагүй ч цаашид “ЭЗТХ-ийг илүү үр дүнтэй болгох, хөрөнгө оруулалтыг нэмэхийн тулд хоёр улсын Засгийн газрын бодлогын дэмжлэг шаардлагатай гэжээ.

Эх сурвалж: МҮХАҮТ