Дэлхийн түүхэд наймдугаар сарын 28-д болсон онцлох гурван үйл явдлыг танилцуулъя.

1963 оны наймдугаар сарын 28. Мартин Лютер Кинг "Надад мөрөөдөл бий" илтгэлээ тавив

Арьс өнгөөр ялгаварлан гадуурхахыг эсэргүүцсэн жагсаал, хөдөлгөөн АНУ-ын нийслэл Вашингтон хотод хүчээ авч 1963 оны наймдугаар сарын 28-д 250 мянган хүн Линкольны хөшөөний өмнө цуглаад байв. Энэ үед сүмийн номлогч бага Мартин Лютер Кинг "Надад мөрөөдөл бий" хэмээх алдарт илтгэлээ тавьжээ.

1993 оны наймдугаар сарын 28. Ida астероидын зургийг авав

Астероидын бүсэд байрладаг "243 Ida" астероидын зургийг анх 1993 оны наймдугаар сарын 28-д Галилео сансрын хөлөг бархасбадь гаргийг тойрч байхдаа авчээ. 1884 оны есдүгээр сарын 29-д Австрийн одон орон судлаач Йоханн Пализагийн илрүүлсэн уг астероид нь сансрын хөлгөөр зургийг нь авсан хоёр дахь астероид юм.

1996 оны наймдугаар сарын 28. Чарльз Диана нар салав

Дөрвөн жилийн турш тусдаа амьдарсан Уэльсийн хунтайж, Британийн хаан ширээг залгамжлагч Чарльз, гүнж Диана нар 1996 оны наймдугаар сарын 28-д албан ёсоор салжээ. 1981 онд гэрлэсэн цагаасаа хойш дэлхий дахины анхаарлын төвд байсан хосуудын салснаас жилийн дараа Диана гүнж ослоор амиа алдсан.