Монгол Улсын их хурал төмөр замын талаар баримтлах бодлогыг баталж, экспортод чиглэсэн шинэ төмөр замыг барьж байгуулахаар анх төсөл боловсруулж эхэлснээс хойш 12 жилийн дараа Тавантолгой-Гашуунсухайт чиглэлийн 233 км төмөр замыг ашиглалтад орууллаа.

Энэ зам биднийг хөгжилд хөтөлнө. Монголчуудыг тэжээнэ. Галбын говь ган замтай боллоо

Цаг хугацаа их алдсан ч төмөр замыг дөрвөн жилийн турш барьж, дуусгаж чадлаа. Төмөр замын өртөө, өртөөний байгууламжуудыг ч барьж дуусжээ.

Ерөнхийлөгч У.Хүрэлсүх замын нээлтийн үеэр "Энэ зам биднийг хөгжилд хөтөлнө. Монголчуудыг тэжээнэ. Галбын говь ган замтай боллоо" гэсэн юм.

Манай улс БНХАУ хооронд 60 гаруй жилийн дараа төмөр замын хоёр дахь боомтоо холболоо. Эхний боомт нь Замын-үүд-Эрээний боомт байв.

Өнөөдөр эхний тээврийг Гашуунсухайт боомт руу эхлүүлэв. Гэвч Гашуунсухайт-Ганцмод боомт дахь ачих-буулгах терминалыг барьж дуусаагүй, гүйцэтгэх компанийг тодруулаагүй байна. Иймд шинэ төмөр замаар урд хил рүү тээвэрлэх нүүрсийг машинд шилжүүлэн ачиж, экспортолно. Ачих буулгах терминал жилийн дараа ашиглалтад орох юм.