БНХАУ-тай хиллэдэг боомтуудын хязгаарлалт суларснаар тавдугаар сард Монгол Улсын нүүрсний экспорт өмнөх саруудаас өссөн байна.

Монгол Улс тавдугаар сард 1.93 сая тонн нүүрс экспортолжээ. Энэ нь сарын дүнгээр өмнөх оны мөн үеэс 46 хувиар, өмнөх сараас 52 хувиар өссөн дүн болж байна. Түүнчлэн нүүрсний экспорт он гарснаас хойш тогтмол өсөж, өнгөрсөн оны дөрөвдүгээр сараас хойших дээд түвшинд хүрчээ.

БНХАУ-ын талтай тохиролцсоноор экспортын гол гарц Гашуунсухайт-Ганцмод боомтоор өдөрт гарах нүүрс тээврийн автомашины тоо нэмэгдсэн байна. Хэдийгээр тавдугаар сард тээврийн жолоочоос COVID-19-ийн халдвар илэрсэн ч дөрөвдүгээр сартай харьцуулахад экспортын нөхцөл байдал сайжирсан аж.

Тайлант сард тус боомтоор өдөрт дунджаар нүүрс тээврийн 372 автомашин хилээр гарчээ. Харин зургаадугаар сарын эхний 10 хоногт дунджаар 407 автомашин хилээр гарсныг “SXCoal” мэдээллээ. Цар тахлын нөхцөл байдалтай холбоотойгоор нүүрс тээврийн автомашины тоо бага зэрэг буураад байгаа юм.

Үүнээс гадна нүүрсний экспортын хоёр дахь гол гарц Сэхэ боомт тавдугаар сарын 25-нд нээгдсэн нь экспортод эергээр нөлөөлж байна. Одоогийн байдлаар өдөрт дунджаар нүүрс тээврийн30-60 автомашинаар тээвэрлэлт хийгдэж байгаа аж.

Тавдугаар сард нүүрс борлуулах дундаж үнэ тонн нь 332 ам.доллар байжээ.

С.Өнөрсайхан