Цахим хөгжил, инноваци, харилцаа холбооны сайд Э.Батшугар арилжааны банкны хар жагсаалтыг халж буй талаар хэвлэлийн хурал зарлалаа. Хэвлэлийн хурал өнөөдөр 15.00 цагт Монголбанкинд болно. 

УИХ-ын гишүүн, ЦХИХХ-ны сайд Э.Батшугарын Зээлийн мэдээллийн тухай хуульд нэмэлт, өөрчлөлт оруулах тухай хуулийн төслийг санаачлан боловсруулж, өргөн мэдүүлсэн нь  2025 оны зургаадугаар сард батлагдсан.

Энэ хууль хэрэгжиж эхэлснээр, Зээлийн мэдээллийн сангийн “хар жагсаалт”-д нэг бүртгэгдчихвэл зургаан жил данслагддаг байдлыг халж байгааг тодотгож хэлмээр байна. Амьдрал баялаг, зээл, зарим төлбөрийг барагдуулахын зуур цаг хугацаа алдах зэрэг бэрхшээлээс үүдэн доголдох тохиолдол гардаг. Тэр асуудлаа аль болох шуурхай шийдээд, зохицуулаад төлсөн ч “хар жагсаалт”-д бичигдчихсэн байдаг. Тэр мэдээлэл зургаан жил хадгалагдаж, хариуцлагагүй зээлдэгч болдог. Зургаан жилийн турш санхүүгийн харилцаанд сөргөөр нөлөөлдөг тул би үүнийг “санхүүгийн ял” гэж тодорхойлж байна.

Зээлийн мэдээллийн тухай хуульд нэмэлт, өөрчлөлт оруулах тухай хууль хэрэгжиж эхэлснээр дээрх шиг нөхцөл буюу нэг удаагийн доголдлоос нь үүдсэн зургаан жилийн санхүүгийн ял оноодог байдлыг халж, эсрэгээрээ онооны системд шилжинэ.

Иргэн зээлийн харилцаандаа хариуцлагатай хандаад, тухай бүр нь төлбөрөө зохих ёсоор нь төлдөг бол оноо нь нэмэгдээд явна. Оноо нь өндөр байхын хэрээр санхүүгийн үйлчилгээ үзүүлэгч байгууллага, банк барьцаа хөрөнгийн шаардлагыг бууруулах, зээлийн хүү бага байх гэх зэргээр иргэнд илүү таатай нөхцөл, үйлчилгээ өгнө. Оноо нь тухайн иргэний биет бус санхүүгийн хөрөнгө болно хэмээн тэрбээр тайлбарлаж байв.