Украин руу хийсэн Оросын дайралтад Киев дэх Европын холбооны төлөөлөгчийн газрын байр болон Их Британийн консулын байр өртсөнд Европын удирдагчид дургүйцлээ илэрхийллээ.

Энэ дайралтаар дор хаяж 23 иргэн амиа алдаж, олон хүн шархдаад байна. Амиа алдсан хүмүүсийн дөрөв нь хүүхэд байжээ.

Европын комиссын дарга энэ дайралтад дургүйцлээ илэрхийлж, өнгөрсөн сараас хойш Оросын талаас хийсэн хамгийн хүнд цохилт болсон гэв.

Тэрбээр “Оросын пуужингууд дипломат төлөөлөгчийн газраас ердөө 50 метрийн зайд, 20 секундын дотор хоёр удаа цохилт өгсөн” гэжээ.

Украины талаас мэдээлснээр ОХУ 600 орчим дрон, 30 гаруй баллистик болон далавчит пуужин харвасан байна.

Украины ерөнхийлөгч Володимир Зеленський “ОХУ хэлэлцээний ширээг бус, зэвсгийг сонголоо” хэмээгээд тэдний эсрэг хатуу хориг арга хэмжээ авахыг дахин уриаллаа.

Улмаар энэ халдлагын хариуд холбогдох ОХУ-ын төлөөлөгчдийг Европын холбооны байранд, Их Британи дахь Оросын элчин сайдыг Гадаад хэргийн яаманд тус тус дуудаад байгаа аж. 

Их Британийн консул нь Европын холбооны төлөөлөгчийн газартай нэг барилгад байрладаг бөгөөд тэдний мэдэгдсэнээр оффис нь ихээхэн сүйдсэн бөгөөд хэсэг хугацаанд үйл ажиллагаа явуулахгүй болсон гэжээ. 

Германы Канцлер Фридрих Мерц "ОХУ үнэн төрхөө дахин харууллаа гэж мэдэгдээд Европын холбооны төлөөлөгчийн газар хүртэл цохилтод өртсөн нь Кремль улам бүр дээрэнгүй болсныг харуулж байна гэжээ. 

Эх сурвалж: ВВС