ХХОАТ-ын тухай хуульд өөрчлөлт оруулах тухай хуулийн төслийн хэлэлцүүлэг болно. 100к иргэдийн саналыг УИХ-ын гишүүн Ж.Баярмаа, О.Амгаланбаатар, Б.Пунсалмаа, Г.Очирбат нар хуулийн төсөл санаачлан ажиллаж байна.

УИХ-ын гишүүн Ж.Баярмаа:
- Төрийн эцсийн зорилго нь иргэдээ тайван амгалан амьдруулах, тэдний авсан цалин нь амьдралд нь хүрдэг байх нөхцөлийг бүрдүүлэхэд чиглэдэг. Татварыг бууруулах санал бүхий цахим гарын үсэгт долоохон хоногийн дотор 100 мянган иргэн нэгдсэн. Уг санал санаачилгыг орхиж огт болохгүй гэдэг үндсэн дээр хуулийн төсөл санаачилсан. Татварыг бууруулах өмнөх санаачилгууд яригдаж байсан ч усанд хаясан чулуу шиг алга болдог. Бид иргэдийн дуу хоолой учир хуулийн төсөл санаачилж, боловсруулаад өргөн барихад бэлэн болоод байна. 

Засгийн газраас өргөн барихаар бэлтгэж буй татварын багц хуулийн төслийг харсан. Түүнд дорвитой өөрчлөлт, хөнгөлөлт, бууралт байхгүй юм байна лээ. 2023 онд Монгол Улсын төсөв 22 их наяд төгрөг, дараа жил нь 30 их наяд төгрөг, 2025 онд 35,6 их наяд төгрөг болж данхайсан. Бид хоёрхон жилийн өмнө 22 их наяд төгрөгөөр амьдарч болоод байсан. Бид өнгөрсөн жил тана гэж шаардлага тавьсан ч хориг тавингуут хасаж болж байгаа юм. Сая Засаг солигдоход 33,4 их наяд төгрөгийг тодотгол хийхээр боллоо. Уг нь хүсэл байвал боломж байгаа, хүсэл байхгүй бол шалтаг, шалтгаан байдаг. Монгол Улсын төрийн өмчит компаниуд маш олон бий. ДНБ-ийн 80 хувьтай тэнцэх хэмжээний хөрөнгө байгаа юм.  Түрээсэлдэг, түрээсэлдэггүй, ашигладаггүй байрнуудаа зарчих. Айлаар жишихэд санхүүгийн байдал нь хүндрэхээр байгаа эд хөрөнгө, машин тэрэг, байр саваа зардаг биз дээ. Тэгэхээр тэр татвар төлөгчдийн мөнгөөр бүрдүүлээд буй төсвөө уг орлогоор бүрдүүлж болохоор юм. Төр баяжихаар эсрэгээрээ иргэд ядуурдаг гэж Монгол улсын төрийн зүтгэлтэн Солийн Данзан гуай хэлсэн байдаг. Төрийн өмчит компанийнхан бүс нь тасартал гэдэс нь томроод, иргэд нь гэдсээ тасартал бүсээ чангалсан байгаагаас өөрцгүй байна. 

Дэлгэрэнгүйг дараах видеоноос хүлээн авна уу.