Нийслэлийн Баянзүрх дүүргийн XIV хорооны нутаг дэвсгэр “Дүнжингарав” худалдааны төвийн урд баригдаж буй Тагнуулын ерөнхий газрын төв байрыг дуудлагаар худалдахаар болсон. Дуудлага худалдааг өнгөрсөн баасан гаригт явуулахаар товлосон ч энэ хугацааг 14 хоногоор хойшлуулжээ.

Дуудлага худалдааны анхны үнийг 13.5 тэрбум төгрөгөөр тогтоосон бөгөөд худалдаанд оролцохоор бүртгүүлсэн компаниудын тоо хангалтгүй байсан тул Төрийн өмчийн хорооноос хойшлуулсан байна.

Улаанбаатар хотын цэвэр агаар бүхий ногоон бүсэд баригдаж буй тус барилга, байгууламж нь нийт зургаан корпустай. Таван корпусын барилгын газар шороо, суурь, карказ, ханын дүүргэлт, гадна дулаалга, гадна доторх шавардлага, дээврийг хийж, цонх суулгажээ.

150 автомашины зогсоол бүхий газар дорх байгууламжтай, сантехник инженерийн шугам сүлжээний холболтыг бүрэн хийсэн обьект аж. Барилгын гүйцэтгэл нь 80 орчим хувьтай, 1.5 га газрын эзэмшилтэй энэ барилгыг бизнесийнхэн нэлээд сонирхож байгаа бололтой.

Тагнуулын төв байрны газрыг анх суурьшлын бүсээс зайдуу хэмээн сонгосон бөгөөд барилгын ажлыг үргэлжлүүлэх цаг хугацааны явцад тус орчинд орон сууцны хороолол олноор баригдсан тул тусгай үйл ажиллагаатай байгууллагад тохиромжгүй болжээ.

Гэхдээ тус газрыг Төрийн ордны баруун талд Төрийн тусгай албан хаагчдын нэгдсэн эмнэлгийн зорилгоор баригдсан байр руу нүүлгэхээр шийдвэрлэсэн гэнэ.