Зун цагт хүүхэд бага­чуудын чөлөөт цагаа өнгө­рөөж, тоглож нааддаг газруу­дын нэг нь Үндэсний соёл амралтын хүрээлэн буюу хүүхдийн парк. Энэ зун тэнд хүүхдийн инээд, шуугиан биш экскаватор, "Ка­маз"-ын дуу нүргэлэн, тоос манарах аж. "Үндэсний соёл амралтын хүрээлэн"-г шинэч­лэх төсөл хэрэгжиж буй нь тэр. 1966 онд ашиглалтад оруулсан тог­лоомууд нь хуу­чирч, өнөө үеийн шаардлага хангахаа больсноос ийн ши­нэчлэх болсон гэнэ.

Хуучин тоглоомуудыг аймгуудад хүргүүлжээ
Хүүхэд ахуйдаа зочлох дур­тай байсан хүүхдийн парк­таа очлоо. Түшиж зогсоод зургаа ава­хуулдаг байсан 12 жилийн баримлын суурь л үлдэж. Хиймэл нуур, завь, эргэдэг тоглоом бүгд алга. Алсыг харагч л ганцаараа ёрдойно. Эргэн тойрны зарим модыг үндсээр нь булга тат­жээ. Экскаваторын жолоочийн яриагаар үхсэн модыг үнд­сээр нь булгалж, олон нэр төрлийн мод тарих гэж суул­гажээ. Харин ургах боломж­той зарим улиасыг өөр газарт шилжүүлсэн гэнэ.

Ногоон зүлэгний оронд тоос манарсан зам, сэндийлж овоолсон шороо энд тэндгүй харагдана. "Камаз" маркийн машин элс ачин нэг өнцгөөс нөгөө рүү зөөх. Энд тэнд архины шил хэвтэж, чихрийн цаас хөглөрнө. Үлгэрч өвөө­гийн хөшөөнд архины шил тэврүүлсэн харагдана.

Тэнд ажиллагсад дөрөв­дүгээр сарын 1-нээс уртас­га­сан цагаар ажиллаж буй нь энэ гэнэ. Үеэ өнгөрөөж хуу­чирсан тоглоомууд, жижиг бай­шин­гуудыг нурааж хогийн цэг рүү ачжээ. Ашиглаж болох зарим тоглоомыг нь айм­гуудад хүр­гүүлсэн аж. Санс­рын аялал, эргэдэг сандал, уран жолоод­лого, сансрын гараа зэрэг тоглоомуудыг Төв аймагт хүргүүлсэн байна. Харин алсыг харагчийг Хэн­тий аймгийнхан ирж авна гэжээ. Алсыг хараг­чийг сайн зас­чихвал 10-15 жил ажил­луулах боломжтой тухай ажилчид нь ярьж бай­лаа. Энэ мэт арваад аймаг "хуучин" хүүхдийн паркийн тоглоо­муудыг авч байгаа аж.

Эхний ээлжийн тоглоомуудыг маргааш хүлээн авна
"Үндэсний соёл амрал­тын хүрээлэн" Японы хөрөнгө оруулалтаар шинэчлэгдэж байгаа аж. Шинэчлэлтийн ажилд нийтдээ 60 орчим сая ам.доллар зарцуулах тоо­цоотой байгаа гэнэ. Хуучин тоглоом, барилга байгуулам­жийг бүгдийг солих аж. Тог­лоом худалдаж авахад 1.6 тэрбум гаруй төгрөг шаард­лагатай гэж тооцоолсон бай­на. Бээжингийн үйлдвэрт тоглоомуудаа захиалсан гэ­нэ. Эхний ээлжийн тоглоо­мууд маргааш ирэх гэж байгаа аж. Бүхэлдээ төмөр хийцтэй алсыг харагч зэрэг 14 төрлийн тог­лоом авчирч байгаа гэнэ. Тэдгээрийг суурилуулж ес­дүгээр сарын 1 гэхэд хэсэг газартаа багачуудыг хүлээн авч болох юм байна. Харин хүүхдийн пар­кийн ши­нэч­лэл 2012 онд дуусахаар төлөв­лөгд­жээ. Шинэ хүүх­дийн пар­кийн тог­лоомын 20-30 хувийг нь барилга дотор байр­луу­лахаар төлөвлөгдсөн учир өвлийн улиралд ч зочдоо хүлээн авах боломжтой гэнэ.

Хүүхдийн паркийн газраас "хумсалжээ"
Үндэсний соёл ам­ралтын хүрээлэн 35 га газартай. Үүний гурван га газарт нь "MSC" компани барилга бари­хаар хашаа татжээ. Энэ тухай "Үндэсний соёл амралтын хүрээлэн"-гийн ерөнхий ин­женер А.Болд ""MSC" компа­ниас гадна "Мон-Уран" компа­ни нэг га газрыг нь авчихсан байгаа. Зөвшөөрөлгүй ба­рилга барьж эхэлсэн газруу­дыг зохих газарт нь мэдэгд­сэн. Ямар ч байсан бид 32 га газарт төлөвлөлт хийж бай­гаа" гэсэн юм.

Б.Цэцэгдэлгэр