Дэлхийн түүхэд дөрөвдүгээр сарын 20-нд болсон онцлох гурван үйл явдлыг танилцуулъя.

1968 оны дөрөвдүгээр сарын 20. Пьер Трюдо Канадын Ерөнхий сайд болов

Либерал намаас нэр дэвшсэн Пьер Эллиот Трюдо 1968 оны дөрөвдүгээр сарын 20-нд Канад улсын 15 дахь Ерөнхий сайд болжээ.

Тэрээр Канад дахь Францын салан тусгаарлах хөдөлгөөнийг зогсоож, шинэ үндсэн хууль боловсруулан анх удаа Хятадтай харилцаа тогтоосон.

Пьер Трюдо нь Канадын хамгийн амжилттай Ерөнхий сайд нарын нэг бөгөөд түүний том хүү Жастин Трюдо 2015 оноос хойш Канадын 23 дахь Ерөнхий сайдаар ажиллаж байна.

2008 оны дөрөвдүгээр сарын 20. "IndyCar" цувралд түрүүлсэн анхны эмэгтэй

26 настай Даника Патрик 2008 оны дөрөвдүгээр сарын 20-нд Японы Мотегид болсон "Indy Japan 300" уралдаанд түрүүлжээ.

Тэрээр Умард Америк дахь формула автомашины уралдааны хамгийн том тэмцээнүүдийн нэг "IndyCar" цувралд түрүүлсэн анхны бөгөөд цорын ганц эмэгтэй болсон юм.

10 настайгаасаа уралдаж эхэлсэн Даника нүцгэн дугуйт авто уралдааны түүхэд хамгийн амжилттай бүсгүй болон түүхэд үлджээ.

2010 оны дөрөвдүгээр сарын 20. 780 тонн газрын тос далайд асгарав

Мексикийн булан дахь "Deepwater Horizon" хэмээх газрын тосны өрөмдлөгийн тавцанд 2010 оны дөрөвдүгээр сарын 20-нд гал гарчээ.

АНУ-ын Луизиана мужийн эргээс 80 км-ын зайд орших уг үйлдвэрт ажиллаж байсан 11 хүн амь үрэгдэж түүхэд бичигдэх их хэмжээний газрын тос асгарсан байна.

Уг өдрөөс хойш дөрвөн сарын хугацаанд 4.9 сая баррель буюу 780 тонн түүхий газрын тос далайд цутгажээ.