Өнгөрсөн хоногт зүүн аймгуудын нутгаар салхи баруунаас 12-16 м/с хүрч зөөлөн шуургатай, Архангай аймгийн Цэцэрлэг, Түвшрүүлэх, Өвөрхангай аймгийн Хужирт, Дорнод аймгийн Чойбалсан, Матад, Сүхбаатар аймгийн Эрдэнэцагаан сумдад хур тундас орж хоножээ.

Цаг агаарын урьдчилсан төлөв байдлаар 30-нд Төв болон зүүн зүгийн нутгийн хойд хэсгээр, 1, 2, 3-нд нутгийн зүүн хагаст хур тунадас, уулархаг нутгаар нойтон цас орж, салхи баруун хойноос 12-14 м/с хүрч зөөлөн цасан болон шороон шуурга шуурна. Нутгийн зүүн хагаст сэрүүхэн, Хангай, Хөвсгөл, Хэнтийн уулархаг нутгаар шөнөдөө 1-6 градус хүйтэн, өдөртөө 7-12 градус дулаан, Алтайн өвөр говь, Их нууруудын хотгор болон говийн нутгийн баруун хэсгээр шөнөдөө 4-9 градус, өдөртөө 20-25 градус дулаан, бусад нутгаар шөнөдөө 3 градус дулаанаас 2 градус хүйтэн, өдөртөө 11-16 градус дулаан байх төлөвтэй байна.