Японы Олон Улсын Хамтын Ажиллагааны ЖАЙКА байгууллагын Монгол дахь төлөөлөгчийн газраас санаачлан “Тогтвортой хөгжлийн зорилгод хүрэх Нээлттэй инновац ба хамтын бүтээл – Монгол 2023” хөтөлбөрийг Монголд анх удаа хэрэгжүүлж байна.

Тус хөтөлбөр нь агаарын бохирдол, усны чанар, хүртээмж, боловсрол, дэд бүтэц, хүнсний аюулгүй байдал зэрэг Монгол Улсад тулгарч буй нийгмийн асуудлуудын шийдлийг инновац болон хамтын бүтээлээр дамжуулан олох, хамтын ажиллагааг дэмжих зорилготой.

Энэ талаар ЖАЙКА-гийн Монгол дахь төлөөлөгчийн газрын дарга Танака Шиничи “Хөтөлбөрийн гол зорилго нь тогтвортой хөгжлийн 17 зорилтыг хэрэгжүүлэх, нийгмийн асуудлыг шийдвэрлэхэд Монгол, Японы оролцогчид хамтран оролцох, хамтын ажиллагаа тогтоох юм. Хөтөлбөрт хувийн хэвшил, ТББ, их дээд сургуулийн судалгааны байгууллагууд хамтран оролцох замаар өөрсдийн мэдлэг туршлагаа хуваалцахын хажуугаар нийгмийн тусын тулд хэрхэн хамтарч ажиллах вэ гэдэг гарц гаргалгаа гаргана. Нийгэмд тулгамдсан асуудлыг шийдвэрлэхэд ямар шинэ санаа гаргаж байна вэ, хэрэгжих нөхцөл бололцоо байгаа юу, санхүүгийн тооцоолол зэрэг олон шалтгааныг үндэслэн сонгон шалгаруулна. Сонгогдсон 10 багаас гадна бусад оролцогчидтой цаашид хамтран ажиллах боломж бий” гэлээ.

Хөтөлбөрт оролцохоор нийт 390 орчим аж ахуйн нэгж, төр,төрийн бус байгууллагаас хүсэлтээ илгээсэн бөгөөд үүнээс 50 байгууллага танхимаар буюу "booth" авч оролцсон юм.

Сонгогдсон байгууллагын төлөөлөл наймдугаар сарын 17-нд Туушин зочид буудлын Соёмбо танхимд өөрсдийн үндсэн бүтээгдэхүүн болон технологийн шийдлүүдээ танилцууллаа. Түүнчлэн зарим компаниуд Япон улсаас онлайнаар оролцов.  

Энэ өдөр 91 шинэ хамтын ажиллагааны санал ирснээс давхардсан тоогоор 47 байгууллага, хувь хүний хамтарсан доорх 10 хамтын ажиллагааны санал шалгарлаа. Үүнд:

• Монголын эко констракшн/Mongolian Eco Construction

“Тэрбум мод” үндэсний хөдөлгөөний хүрээнд зулзаган модыг хамгаалж, өвлийн улиралд цас, салхинаас хамгаалах модоор хийсэн хашлага байршуулах зэрэг төслийг хөтөлбөрийн хугацаанд хэрэгжүүлэхээр төлөвлөж байна.

• Эрүүл эцэг эх, эрүүл хүүхэд/Healthy parents, healthy kid

Сонгинохайрхан дүүргийн эмнэлэг болон Eclinic ХХК-ийн хамтарсан баг нийгмийн эрүүл мэндийг дэмжих, эрүүл мэндийн боловсрол олгох чиглэлээр хамтран ажиллана.

• Ухаалаг хяналт/Intelligent Traffic Monitoring

Machine Learning UB төрийн бус байгууллага болон ХААИС-ийн Мөөгний сургалт, судалгаа хөгжүүлэлтийн төвийн хамтарсан баг ухаалаг системээр дамжуулан мөөгний өсөлтийн явцыг хянах ухаалаг, автомат шийдлийг бий болгох зорилготой юм.

• Мэргэжлийн операторын аутсорсингийн үйлчилгээ/Professional Operator Outsourcing Service

Харилцаа холбоо, техник технологи, судалгааны байгууллага зэрэг олон салбарын компани, ТББ-аас бүрдсэн дээрх баг орон нутагт амьдарч буй эмэгтэйчүүд болон тэргэнцэртэй иргэдийг хөдөө орон нутгаас дотоодын аж ахуйн нэгжүүдэд дуудлагын үйлчилгээ үзүүлэх мэргэжлийн оператораар сургаж, ажлын байраар хангана. Тэд тогтвортой хөгжлийн 17 зорилтын 1, 5, 8, 9, 10-р зорилтуудыг хэрэгжүүлэхэд бодитой хувь нэмэр оруулна гэж үзэж байна.

• Сургуулийн менежментийг сайжруулах төсөл/School management improvement project

Шинэ Монгол сургуулийн судалгааны төвөөс санаачлан хэрэгжүүлэх гэж буй төрийн өмчийн сургуулиудыг хамарсан менежментийг сайжруулах төсөл.

• Хонины ноосноос гаргаж аюсан 100 хувь био бордоо/Organic vegetable by Japanese seed and eco mushroom cultivation using Sheep wool 100% natural based fertilizer

Хонины ноосон 100 хувь байгалийн гаралтай бордоог ашиглан япон үр, эко мөөг, органик хүнсний ногоо гарган авна.

• 3D printing with recycled plastic

Огт биетээр оршдоггүй, даавуу материал, ус ашиглаагүй байгальд ээлтэй виртуал хувцасны шийдэл.

• Oneday JOB

Монгол Улсын эдийн засгийн өсөлтийг дэмжих, хөдөлмөрийн зах зээлийг хөгжүүлэх зорилготой тус төсөл нь их, дээд сургуулийн оюутнуудыг цагийн болон өдрийн ажлын байраар хангах замаар ур чадвараа дээшлүүлэх, туршлага хуримтлуулах боломжийг олгоно.

• ARGAL PAPER

Аргалаас гаргаж авсан түүхий эд, даавуун болон жийнсэн материалтай хувцасны хаягдлыг дахин боловсруулан байгальд ээлтэй цаас гарган авдаг. Гэсэн хэдий ч Монгол Улс нүүрсний эрчим хүчнээс хамааралтай учир дээрх хамтарсан баг нарны энергийг ашиглан эрчим хүчнийхээ 90 гаруй хувийг сэргээгдэх эрчим хүчнээс авах боломжийг бүрдүүлэх зорилготой аж.

• QPARKING - AERONEXT LLC

Хүргэлтийн үйлчилгээг шинэ шатанд гаргах, DRONE хүргэлтийн үйлчилгээг нэвтрүүлэх зорилготой төсөл.

Хөтөлбөрт шалгарсан дээрх 10 хамтын ажиллагааны саналд ЖАЙКА ирэх 2024 оны хоёрдугаар сар хүртэл зөвлөгөө өгч ажиллах бөгөөд Япон улсын компаний сонгогдсон тохиолдолд Монголд зорчих замын зардалд тодорхой дэмжлэг үзүүлнэ. Түүнчлэн шалгарсан хоёр багт тус бүр 50 сая төгрөг хүртэлх санхүүжилтийг хэрэгжүүлэлтийн зардал болгон олгоно.