Энэ сарын 24-нд буюу дайн эхэлсний хоёр жилийн ойн өдөр Украинчууд дайнд амиа алдсан цэргүүдэд хүндэтгэл үзүүлэв.   

2022 оны хоёрдугаар сарын 24-нөөс хойш  31 мянган украин цэрэг амиа алджээ. Тус улсын Ерөнхийлөгч Володимир Зеленьский оросуудын цэргийн төлөвлөлтөд тус болж болзошгүй хэмээн шархадсан цэргийнхээ тоог хэлээгүй байна. Харин ОХУ өнөөг хүртэл нийт хэдэн цэргээ алдсаныг мэдээлээгүй ч Украин 180 мянга, Их Британи 350 мянган цэрэг эндсэн гэж тус тусынхаа таамгийг танилцуулсан юм.

Барууны улсууд Украинд энэ онд үзүүлэх тусламжийнхаа талыг хойшлуулсан. Энэ нь олон зуун украин хүний аминд хүрэх, газар нутгаа алдах эрсдэлтэйг Украины Батлан хамгаалахын сайд Рүстэм Умеров мэдээлжээ.

Дайнд 300 мянга заримдаа 500 мянган украин хүн амиа алдсан гэдэг нь ташаа мэдээлэл. ОХУ санаатайгаар хуурамч мэдээлэл түгээсэн гэж Украины Ерөнхийлөгч онцолжээ. Мөн тэрээр олон мянган энгийн иргэн дайнд үрэгдсэн ч тоог нь нарийвчлан тогтоох боломжгүй байна гэсэн байна.

АНУ-ын эрх баригчид дайнд амиа алдсан украин цэргийн тоо 70 мянга, шархдагсдын тоо 120 мянга гэж таамаглаж байна.

ВВС телевизийн орос хэл дээр мэдээ бэлтгэдэг баг Mediazona хэмээх сайттай хамтран амиа алдсан, оросын 45 мянган цэргийн нэрийг бүртгэжээ.

Эх сурвалж: BBC