“Монгол орноо бүтээн байгуулцгаая” уриан дор дэд бүтцийн томоохон дөрвөн салбарын нэгдсэн үзэсгэлэнг энэ жил анх удаа аравдугаар сарын 23-24-ний өдрүүдэд Мишээл экспо төвд зохион байгуулах гэж байна.

Бүтээн байгуулалт - 2020 үзэсгэлэнд оролцож буй “Улаанбаатар БҮК” ХК-ийн Гүйцэтгэх захирал Х.Золжаргалаас арга хэмжээний талаар тодруулсан юм.

-“Улаанбаатар БҮК” компанийн хувьд Бүтээн байгуулалт - 2020 үзэсгэлэнд анх удаа оролцож байна. Үзэсгэлэнгийн цар хүрээг хэрхэн харж байна вэ?
-Улс орныхоо хөгжил, дэвшил, бүтээн байгуулалтад бодит хувь нэмрээ оруулдаг салбарынхан нэг дор цуглаж, туршлага солилцох, хамтран ажиллах боломжийг олгодог томоохон арга хэмжээ гэж харж байна.

-“Улаанбаатар БҮК” компаниа товчхон танилцуулаач.
-Манайх Монгол Улсын хөрөнгийн биржид бүртгэлтэй нээлттэй хувьцаат компани. Бид барилга, эрчим хүч, зам тээвэр, дэд бүтцийн салбарын бүтээн байгуулалтад өндөр технологи шаардсан нарийн хийц загварын төмөр бетон болон металл хийц эдлэлийн бүхий л төрлийн бүтээгдэхүүнийг үйлдвэрлэн нийлүүлж, харилцагчдынхаа талархлыг хүлээсээр ирсэн.

Энэ оны эхний хагасын байдлаар 280 орчим ажилтантайгаар үйл ажиллагаа явуулж улсад 1,35 тэрбумын татвар төлж, дотоодын аж ахуй нэгжүүдээсээ 14,9 тэрбум төгрөгийн бүтээгдэхүүн үйлчилгээ худалдан аваад байна.

-Энэ жилийн үзэсгэлэнд ямар шинэлэг бүтээгдэхүүн танилцуулахаар төлөвлөж байна вэ?
-Улаанбаатар БҮК ХК нь 2013 онд Англи улсын “Railway moulds and systems” компанийн төмөр замын бетон дэрний үйлдвэрлэлийн тоног төхөөрөмжийг үйлдвэрлэлд нэвтрүүлсэн. Жилдээ 584,000 ширхэг төмөр замын бетон дэр үйлдвэрлэх хүчин чадалтай. Бид европ стандарт, Английн пандрол бэхэлгээтэй 1 гол дээр 25 тонн ачаа даах чадалтай төмөр замын бетон дэрийг үйлдвэрлэж Тавантолгой-Зүүнбаян чиглэлийн төмөр замын төсөлд нийлүүлж байна.

Төмөр замын дэр бетон үйлдвэрлэлд зориулан бетон зуурмагийн үйлдвэр шинээр ашиглалтад оруулсан бөгөөд Монголд анх удаа өөрсдөө суурилуулж, угсарсан.

Бид энэ удаагийн үзэсгэлэн арга хэмжээнд өөрсдийн үйлдвэрлэж буй бүтээгдэхүүний нэг болох “Төмөр замын бетон дэр” –ийг танилцуулахаар төлөвлөж байна.

-“Улаанбаатар БҮК” компанийн үйл ажиллагааны талаарх сүүлийн үеийн мэдээллийг уншигчдад өгнө үү.
-Бид Монгол Улсын эдийн засгийн хөгжилд нөлөө үзүүлэх томоохон төслүүдэд бүтээгдэхүүнээ нийлүүлсээр ирсэн бөгөөд сүүлийн жилүүдэд хийж гүйцэтгэсэн ажлуудаас дурдвал:

• 2019-2020 он Монголын төмөр зам ТӨХК-ийн захиалгаар Тавантолгой- Зүүнбаян чиглэлийн 414,6 км төмөр замын төсөлд Төмөр замын бетон дэр нийлүүлж байна.
• 2019 онд Улаанбаатар төмөр зам ХНН-ийн захиалгаар Дорноговь аймгийн Алтанширээ суманд баригдаж буй нефть боловсруулах үйлдвэр рүү тавигдсан 27 км төмөр замын төсөлд төмөр замын бетон дэр нийлүүлсэн.
• 2020 онд Зэвсэгт хүчний бүтээн байгуулалтын дэмжлэгийн газрын захиалгаар Тавантолгой- Зүүнбаян чиглэлийн 414,6 км төмөр замын төслийн доод бүтцэд үерийн ус зайлуулах төмөр бетон хоолой нийлүүлсэн.
• 2019 онд Батлан хамгаалах яамны захиалгаар Дорноговь аймгийн Алтанширээ сумын нутаг дэвсгэрт баригдах Нефть боловсруулах үйлдвэр рүү тавигдах хатуу хучилттай авто замын төсөлд төмөр бетон хоолой бэлтгэн нийлүүлсэн.
• Эрдэнэт үйлдвэр ТӨҮГ-ийн 96м урт, 52м өргөн, 33м өндөр, 125 тн гүүрэн крантай нийт 4992м.кв талбайтай байгууламжийн металл хийц, 125 тн гүүрэн краны балк үйлдвэрлэл угсралтыг гүйцэтгэсэн.
• Хөвсгөл аймгийн Цагаан-Үүр сумын Үүрийн голын 326м урт гүүрний ажил.
• АПУ ХК-ийн 122м урт, 38м өргөн, 35м өндөр, нийт 4636м.кв талбайтай бүрэн автоматжуулсан агуулахын барилга зэрэг олон олон бүтээн байгуулалтын ажилд өөрсдийн хувь нэмрийг оруулсан.

-Барилга дэд бүтэц, эрчим хүчний салбарын томоохон төлөөлөл болсон компанийн хувьд Монголын барилгын салбарын ойрын жилүүдийн хандлагыг хэрхэн харж байна вэ?
-Бид Монгол Улсынхаа ирээдүйн хөгжил дэвшилд итгэдэг. Иймээс ч улс орныхоо бүтээн байгуулалтын нэгээхэн хэсэг нь байх зорилго тавин ажилладаг. Төмөр зам, авто зам, барилга, эрчим хүч гээд дэд бүтцийн салбарын хөгжлөөс улс орны ирээдүйн хөгжил шалтгаална. Бидний хувьд үйлдвэрлэлээ улам бүр өргөжүүлж шинэ бүтээгдэхүүнүүдийг зах зээлд нэвтрүүлж, өрсөлдөх чадвараа сайжруулна. Бидний хувьд Засгийн газар, томоохон аж ахуй нэгжүүдээс хэрэгжүүлэх бүхий л төсөлд хамтран ажиллахад бэлэн байна.