Эрүүл мэндийн сайд Т.Мөнхсайхан Нийслэлд үйл ажиллагаа явуулж буй өрхийн эрүүл мэндийн төвүүдийн  эмч, ажилтнууд болон дүүргийн ЭМГ-ын ӨЭМТ-г хариуцсан мэргэжилтэн нарыг хүлээн авч уулзлаа. 

Энэ үеэр Эрүүл мэндийн сайдын зөвлөх, ТУТ менежер О.Чимэдсүрэн нийслэлд үйл ажиллагаа явуулж буй 45 ӨЭМТ нь одоог хүртэл магадлан итгэмжлэгдээгүй, энэ нь ЭМД-аас санхүүжилт авч иргэдэд тусламж үйлчилгээ үзүүлэх боломжгүй байгааг хэлжээ.

Энэ асуудлыг шийдвэрлэхээр холбогдох талууд энэ чиглэлд шуурхай ажиллаж байгаа юм байна.

Эрүүл мэндийн сайд Т.Мөнхсайхан хэлэхдээ "ЭМЯ хүн амд үзүүлэх эрүүл мэндийн тусламжийн үндсэн чиглэл болох НЭМ-ийн тусламжийн хүртээмж, чанарыг сайжруулахын тулд ӨЭМТ, СЭМТ-ийг чадавхжуулах замаар ялангуяа урьдчилан сэргийлэлт, эрт илрүүлэгт иргэн, өрх бүрийг хамруулан Иргэний эрүүл мэндийн мэдээллийн нэгдсэн сантай болох ажлыг эхлүүлэн одоогоор 8 аймаг, 2 дүүргийг хамруулахаар ажиллаж байна. Анхан шатны төвшинд эмч, эмнэлгийн мэргэжилтэнг ачаалалд оруулж, цаг бардаг анхан шатны эрх зүйн баримт, тушаал, шийдвэрийг эргэн харах, цахим болгох, оновчтой цөөн үзүүлэлтээр ӨЭМТ, СЭМТ-ийн үйл ажиллагааг явуулах, дүгнэхэд онцгой анхаарч хамтран ажиллана" гэлээ.  

Уулзалтаар ӨЭМТ-ийн эмч нарын зүгээс ӨЭМТ –ийн санхүүжилт 2 дахин нэмэгдсэн нь тусламж үйлчилгээг өргөтгөх, ажиллаж буй багийн нийгмийн асуудлыг шийдэхэд маш том түлхэц болсныг дурдахын зэрэгцээ анхан шатны маягт бүртгэл маш нүсэр, оновчгүй, НЭМ олон хөтөлбөрүүд уялдаа бага, үр дүнг үнэлэхэд төвөгтэй, цахимжсан үйлчилгээ хомс буюу тайлан, мэдээ гаргахад ихэнх цаг зарцуулдаг тул энэ чиглэлд онцгой анхаарч ажиллах талаар санал гаргасан гэж ЭМЯ-наас мэдээллээ.