Барилга, хот байгуулалтын яам (БХБЯ), НҮБ-ын Хөгжлийн Хөтөлбөр (НҮБХХ) хамтран 2017-2020 онд “Монгол улсын барилгын салбарын хүлэмжийн хийн ялгарлыг бууруулах үндэсний арга хэмжээ (НАМА)” төслийг хэрэгжүүлжээ.

Энэ төслийг Даян дэлхийн байгаль орчны сангаас санхүүжүүлсэн байна.

Уур амьсгалын өөрчлөлт хүн төрөлхтний аж байдал, байгаль орчинд шууд сөргөөр нөлөөлж байгаа энэ үед дэлхийн дулаарлыг 1.5 хэмээс хэтрүүлэхгүй байхын тулд 2010-2030 оны хооронд дэлхий дахины хүлэмжийн хийн ялгарлыг одоогийнхоос даруй 45 хувиар бууруулах шаардлагатай.

Манай улсын хүлэмжий хийн ялгарал өнөөгийн эрчээрээ үргэлжилбэл 2030 он гэхэд 2014 оны үзүүлэлтээс хоёр дахин нэмэгдэх төлөвтэй байна. Монгол улсын нийт ХХЯ-ын 50 гаруй хувийг эрчим хүчний салбар дангаараа бүрдүүлж, барилгын салбар хоёрдугаарт орж байна.

Дээрх төсөл хэрэгжиж эхэлснээр барилгын салбарт эрчим хүчний хэмнэлтийг сайжруулах, дулаан алдагдлыг бууруулахад багагүй ахиц гаргажээ. Салбарын түвшинд хүлэмжийн хийн ялгарлын тооллого хийх аргачлал боловсруулан, хүлэмжийн хийн ялгарлын суурь түвшнийг тогтоож, вэбэд суурилсан тооллогын анхны цахим системийг бий болгож, хөгжүүлжээ. Мөн БХБЯ албан ёсоор журамд оруулан баталсан хүлэмжийн хийн ялгарлыг бууруулах аливаа бодлого, арга хэмжээ, төсөл хөтөлбөрийн үр дүнг хэмжих, тайлагнах, нотлох тогтолцооны суурийг бүрдүүлсэн байна.

48 мянга гаруй тонн хүлэмжийн хий ялгарлыг бууруулах зургаан загвар төслийг хэрэгжүүлжээ. Төслийн хүрээнд 420 гаруй албан хаагч, мэргэжилтнүүдийг сургаж, эрчим хүчний хэмнэлтийн чиглэлд 50 гаруй ажлын байр шинээр бий болгоход дэмжлэг үзүүлжээ.