Сангийн сайд Ч.Хүрэлбаатар саарал жагсаалтаас гарахын тулд өнгөрсөн хугацаанд ямар арга хэмжээ авсныг танилцуулав.

Тэрээр энэ сарын эхээр Бээжинд болсон ФАТФ-ын хуралд тайлангаа явуулсан гэсэн юм.

-ОУВС-гийн хөтөлбөр үргэлжлэх үү?   

-Үргэлжилнэ. Ямартаа ч тавдугаар сард энэ хөтөлбөр дуусна. Дууссаны дараа дараагийн ажлаа ярилцъя.

-Бээжинд болсон ФАТФ-ын хурлын талаар мэдээлэл өгөхгүй юу? 
-Саарал жагсаалтад орсон тул дөрвөн сар тутамд ФАТФ руу тайлан илгээх үүрэгтэй. Энэ дагуу нэгдүгээр сард тайлан явуулсан. Бидэнд өгсөн 6 зөвлөмжөөс 3-ыг нь хамгаалсан. Үлдсэн 3 зөвлөмжийг хэрэгжүүлэхээр үргэлжлүүлэн ажиллана. Эхний зөвлөмж нь мөнгө угаахтай холбоотой гэмт хэргийг шийдэх буюу дуулиан шуугиан болгож өнгөрөлгүй, хуулийн байгууллагаар шийдүүлэх, прокурор, шүүхийн шатанд тухайн хэрэг мартагдах, удаан хугацаанд үргэлжилдэг байдлыг зогсоох. Мөн энэ төрлийн хэргийн зүйл ангийг өөрчилдөг тохиолдол бий. Мөнгө угаах гэмт хэргийг үл хөдлөх хөрөнгө, алт, үнэт чулуу, үнэт эдлэлээр дамжуулан үйлддэг тул хяналтаа сайжруулах зөвлөмжийг мөн бидэнд өгсөн. Гурав дахь нь үй олноор хөнөөх зэвсгийн санхүүжилттэй холбоотой.  

Саарал жагсаалтаас гарахын тулд нийт 7 хуульд өөрчлөлт оруулах шаардлагатай.

-УИХ-ын Х.Нямбаатар УИХ-ын зарим гишүүн эдгээр хуулийн төслийг хэлэлцэх явцад компанийн захирлын хувиар хандаж байна гэж шүүмжилсэн.

-Х.Нямбаатар гишүүн үнэнийг л хэлсэн. Учир нь Мөнгө угаах гэмт хэрийн санхүүжилт, энэ хэргийг мөрдөн шалгах арга замтай холбоотой хоёр хууль “унасан”. Татварын гэмт хэрэгт ногдуулах ял бага тул мөнгө угаасан гэмт хэргийг энэ зүйл анги руу оруулж байж болзошгүй. Ялын хэмжээ, торгуулийг нэмэх саналыг УИХ-ын зарим гишүүн дэмжээгүй. Ингэснээр биднийг их төвөгтэй байдалд оруулж байна. Бид саарал жагсаалтад удах тусам ААН-үүдэд ашиггүй. Уг нь бүгд тал талдаа хичээх ёстой.         

-Ирэх сараас тэтгэврийн зээлтэй ахмадууд тэтгэврээ бүрэн авах уу?
-УИХ-ын дарга Г.Занданшатар, Монголбанкны Ерөнхийлөгч Б.Лхагвасүрэн нараас асуу. Учир нь тэтгэврийн зээлийг улсын төсвөөс мөнгө гарган, тэглэхгүй.

-БНХАУ-ын Ардын банктай хийсэн своп хэлцлийг сунгах үү?
-Энэ хэлцлийн дүн 1.8 тэрбум америк доллартай тэнцэнэ. ОУВС-гийн хөтөлбөр хэрэгжиж эхэлсэн тул өмнө нь нэг удаа сунгасан. Төв банк хэлцлээ үргэлжлүүлж байна. Харин Сангийн яам ОУВС-тай ярилцаж байна.       

Арванхоёрдугаар сарын 31-ний үдэш Ерөнхийлөгч Х.Баттулга тэтгэврийн зээлтэй бүх ахмадын зээлийг бүрэн тэглэх амлалт өгсөн. Үүний дараа 6 хүртэл сая төгрөгийн зээлийг л төрөөс нэг удаа төлөх хууль гарсан юм. Энэ дагуу ирэх сард 6 хүртэл сая төгрөгийн зээлтэй ахмадууд тэтгэврээ зээлдээ суутгуулалгүй, гар дээрээ авна хэмээн хүлээж байна. Үндэсний аюулгүй байдлын зөвлөлөөс гаргасан дээрх шийдвэрээр төрөөс 776 тэрбум тбуюу их хэмжээний мөнгийг арилжааны банкуудад төлөх болоод байгаа юм. Иймд ОУВС-гаас Сангийн яаманд хандаж, Өргөтгөсөн санхүүжилтийн хөтөлбөр үргэлжилж байхад Монгол Улс амлалтаа зөрчсөнийг сануулсан юм. Харин Сангийн яамнаас “Хөтөлбөр хэрэгжиж эхэлсэн үеэс өөр нөхцөл байдал үүссэн” гэдэг тайлбарыг ОУВС-д өгчээ.